Kózi álsiz kóretinderge arnalǵan taktıldi plıtalar kóbine trotýarlarǵa, jaıaý júrginshilerge arnalǵan jol ótkelderine, baspaldaqtarǵa, temir jol beketteri platformalary men aıaldamalarǵa tóseledi. Mundaı tósenishterdiń betinde zaǵıp jandardyń qaýipsiz júrip-turýyna kómektesetin arnaıy budyr núkteleri bolady.
Kásipker bıyl isin odan ári damytyp, qaldyqtan qum-polımer taqtatastaryn óndirýdi bastady. Jas kásipker osydan tórt jyl buryn oblystyq kásipkerler palatasy janyndaǵy «Bastaý bıznes» kýrsyna jazylǵan edi. Ondaǵy mamandardyń kómegimen óz bastamasyn iske asyrý úshin memleketten 4,7 mln teńge kóleminde grant aldy.
– Aı saıyn plastıkalyq bótelkelerden, turmystyq hımııa ydystarynan eki tonna polımer untaǵyn shyǵaramyn. Taıaýda qum-polımerli plıtkalar óndirisin ashtym. Kóringen jerde shashylyp jatqan qoqysty jarata bilseń, kádege asady. Plastık qaldyqtarynan taktıldi trotýar plıtkasyn shyǵaryp jatyrmyn. Meniń eki kózim de nashar kóredi. Sondyqtan ózim sııaqty zaǵıp jandarǵa onyń qanshalyqty qajet jáne mańyzdy ekenin jaqsy bilemin, – dedi Andreı Zelevskıı.
Ázirge, sehta eki adam jumys isteıdi. Aldaǵy ýaqytta kásipker taǵy bir múgedek kisini jumysqa shaqyrmaq. Andreı endi fosfor arqyly kúndiz boıyna jaryq jınap, túnde sáýle shashatyn tósemtastar shyǵarýdy kózdeıdi.
Qostanaı oblysy
