Sáıkesinshe, altyndy qorǵaý talaptary da kúsheıgen. Endi úmitkerlerdiń emtıhan jumysy eki kezeńdi tekserýden ótpek.
Bıyl Shymkentte «Altyn belgige» 513 úmitker usynylyp, rekordtyq kórsetkishke jetip otyr. Alaıda úzdik túlekterdi endi bilimin dáleldeý úshin eki synaq kútip tur. Altyn belgi úmitkeri aldymen óz oqý ornynda jazbasha emtıhan tapsyrady. Ekinshi kezeńde bilim basqarmasy janynan qurylǵan komıssııa tekserilgen emtıhan jumystaryn qaıta qaraıdy. Eger úmitker mektep emtıhanynan bes alyp, komıssııa ol jumysty tórtke baǵalasa, oqýshy «Altyn belgini» ıelene almaıdy.
Mundaı talap ata-analardy da beı jaı qaldyrǵan joq. Olardyń oıynsha, bul ózgerister balaǵa artyq kúızelis pen salmaq salýy múmkin. Al komıssııa ádil sheshimin shyǵarady dep senim bildirip otyr.
Al sala mamandary bul mektep muǵalimderine senimsizdik emes, kerisinshe, basty maqsat pandemııa kezindegi bilim deńgeıine saraptama júrgizý dep sendirdi. Bilim basqarmasyndaǵylardyń málimetinshe, bıyl úmitkerlerdiń basym bóligi medısına salasy boıynsha hımııa-bıologııa, IT salasy boıynsha fızıka-matematıka pánderin tańdap otyr eken.
Pedagogtardyń aıtýynsha, onlaın oqý formaty oqýshylardyń bilim deńgeıine aıtarlyqtaı keri áserin tıgizbegen. Oǵan «Altyn belgiden» úmitkerler sany dálel bola alady deıdi saladaǵylar.
Máselen, byltyr Shymkentte 401 oqýshy úmitti aqtasa, bıyl «Altyn belgige» úmitkerler sany 112 shákirtke artyq. Onyń 321-i – qyz bala, 192-si – ul.
