Áskerı-patrıottyq klýbtar, kadet synyptarynyń, áskerı mektep-ınternattardyń jáne «Jas Ulan» respýblıkalyq mektepteriniń oqýshylary, 6506 áskerı bólimshesi, Tólebı aýdandyq shekara basqarmasy, Ekinshi dúnıejúzilik soǵys jáne Aýǵan soǵysynyń ardagerleri, Shýche, Qapshaǵaı qalalaryndaǵy «Baldáýren» ROSO fılıaldary ókilderi oflaın qatysqan is-sharada batyrdyń erlik joly baıandaldy. Kúni keshe Reseı SIM jarııa etken derekter de oqyldy. Raqymjan Qoshqarbaev shaıqasqan 150-shi atqyshtar dıvızııasy 1945 jyldyń 30 sáýirinde, Reıhstagqa shabýyl jasaıdy. Jańbyrdaı jaýǵan oqtan jasqanbaǵan leıtenant Raqymjan Qoshqarbaev pen qatardaǵy jaýynger Grıgorıı Býlatov, fashıster tireginiń keńsesine bárinen buryn jetip, jeńis týyn Reıhstagtyń birinshi qabatyna tigedi. Osy erligi úshin 150-shi dıvızııa basshylyǵy qazaq jaýyngerine «Keńes Odaǵynyń Batyry» ataǵyn berý týraly usynys joldaıdy. Alaıda sol kezdegi KSRO basshylary ádiletsiz sheshim qabyldap, Qoshqarbaevqa eń joǵarǵy nagradanyń ornyna Qyzyl Tý ordenin beredi. Ol, sondaı-aq I dárejeli Otan soǵysy ordenimen, «Berlındi alǵany úshin», «Varshavany azat etkeni úshin» medaldarymen marapattaldy. Arada jarty ǵasyr ótken soń, resmı Máskeý tarıhı qatelikti túzetip, qazaq batyrynyń erligin moıyndaýǵa májbúr bolady. Tarıhı derekterge sáıkes, sol kúni Reıhstagtyń tóbesinde 40 jalaý jelbiregen eken. Alaıda olardyń tek toǵyzy ǵana Jeńis týy, qalǵandary shabýylǵa qatysqan áskerı bólimshelerdiń baıraqtary kórinedi. Qazaq batyrynyń naǵyz Jeńis týyn bárinen buryn tikkeni búginde ábden dáleldendi. Eren erligimen el esinde qalǵan batyr 1988 jyly dúnıeden ótti. «Halyq Qaharmany» ataǵy R.Qoshqarbaevqa 2001 jyly berildi. Osyndaı derekterdi keltirgen «Eren eńbegi» úshin jáne Y.Altynsarın tósbelgisiniń ıegeri, «Qazaqstandyq jas patrıottar akademııasy» negizin qalaǵan Muhıtdın Tólepbaı jastardy otansúıgishtikke shaqyryp, el tarıhyn tereń tanýǵa, erlikti qurmetteýge úndedi. Al «Baldáýren» respýblıkalyq oqý-saýyqtyrý ortalyǵynyń dırektory Serjan Álibaev estafetanyń mán-mańyzyna toqtalyp, jastardyń bilimdi bolýy qazirgi zamannyń basty talaby ekenin atap ótti. Fılıal dırektory D.Bosymbaev «Halyq Qaharmany Raqymjan Qoshqarbaev» taqyrybynda baıandama jasady.
Sondaı-aq estafeta barysynda jas patrıottardy akademııaǵa qabyldaý rásimi ótkizildi.
Túrkistan oblysy
