Amangeldi Qııas «Egemen Qazaqstan»
Qyryq jylǵa taıaý jıǵan-tergendi qaıta bir qarap, 3 jylǵy tynymsyz eńbektiń nátıjesinde dúnıege kelgen kitap bul. Qazaq sportynyń keıingi 75 jyl tarıhyn qamtıtyn osy bir qundy dúnıe, uly dalanyń dańqyn asqaqtatqan darabozdardy daıarlap, jeńiske jetýine tikeleı dáneker bolǵan bapkerlerdi oqyrmandaryna jeke-jeke tanystyrýǵa bel býǵandaı. El erekshe yqylas tanytqan bul eńbek sońǵy qos ǵasyrdaǵy tańdaýly 120-dan asa bapker men olardyń 500-den astam shákirti týraly derekter men materıaldardyń basyn qosady.
Bútindeı bir ǵylymı-zertteý ınstıtýtynyń belin qaıystyrar mehnaty mol sharýasyn jalǵyz ózi moıynyna alǵan Qydyrbek aǵamyz eńbekqorlyq pen tabandylyqtyń, yjdahattylyq pen uqyptylyqtyń arqasynda ony oıdaǵydaı atqaryp shyǵyp, oqyrmanyna olja saldy.
Parlament Májilisiniń depýtaty Darhan Myńbaı: «Bul – bapkerlerge qoıylǵan eskertkish» dep laıyqty baǵasyn da bergen edi. «Dúrkiregen, dúbirlegen dodalar – kóz ben kóńildi birdeı arbaıtyn sport dúnıesiniń bergi jaǵy ǵana. Al onyń ar jaǵynda myńdaǵan sańlaqtardy osy alamanǵa janyn sala baptap, qylyshtaı qaırap ákeletin júzdegen bapkerlerdiń jankeshti mańdaı teri, izdenisi, surapyl tirligi jatyr», dep jazady ol kisi óz alǵysózinde.
Qazaq bapkerlerine arnalǵan kitap jaryqqa shyqqanǵa deıin Qydyrbek aǵamyzdyń «Qazaq balýandary», «Qazaq boksshylary», qos tomdyq «Qazaq olımpıadashylary» derekti jınaqtary, sonymen qatar «Dáýlet», «Surmergen», «Bekzat», «Berikqazy», «Turlyqan Qasenuly» kitaptary da óz oqyrmandaryn taýyp, kópshilikten óz baǵasyn alyp úlgergen edi.
Al joly da, jóni de bólek «Qazaqtyń 72 bapkeri» kitaby sport tarıhyndaǵy beldi jattyqtyrýshylar týraly jazylǵan tuńǵysh tolymdy kitap dep baǵalanýda.
Osy oraıda kitap avtory Qydyrbek Rysbek aǵamyz bylaı dep oı órbitedi: «Bul kitaptarǵa shyqqan adamdardyń bárimen jaqsy aralastym. Tek ekeýimen ǵana sóılese almadym. Onyń bireýi – 1969 jyly qaıtys bolǵan Oktıabr Jarylǵapov, ekinshisi – 1996 jyly qaıtqan Keńes Omaruly. Kitapqa ár keıipkerdiń sýretin erteń bizdiń urpaǵymyz 50-100 jyldan keıin maqtanyp aıtyp otyratyndaı etip ádeıi túsirtkizdim. Ult tarıhyn ýaqytynda jınaqtap, tasqa basyp otyrmasaq, erteń kóp nárse kómeski tartyp, talaı tulǵalarymyz umyt bolary sózsiz».
Rasynda da, ulttyń upaıyn túgendep júrgen ustaz-bapkerler umyt qalmasy úshin úlken joba qolǵa alyndy. Aldaǵy kúnderde de jalǵasyn tabady dep úmittenemiz.
Juldyzdy tabý da, ony jarqyratyp jaǵý da ońaı sharýa emes. Muny bapkerdiń bapkeri ǵana oıdaǵydaı atqara alsa kerek-ti...
...О́lsheýsiz tógilgen mańdaı terdiń óteýindeı bolǵan óte bir qundy dúnıe osylaısha óz oqyrmanyna jol tartty. Aq jolyn tileıik, aǵaıyn!
