Memlekettik jastar syılyǵynyń ıegeri atanýdyń bıylǵy talaby týraly Aqparat jáne qoǵamdyq damý mınıstrligi Jastar jáne otbasy isteri komıtetiniń tóraǵasy Shahmardan Baımanov aıtyp berdi.
«2021 jylǵy 20 mamyrda «Daryn» memlekettik jastar syılyǵyna úmitkerlerdiń qujattaryn qabyldaý bastaldy. Barlyq talantty jasty atalǵan baıqaýǵa qatysýǵa shaqyramyz. О́tinimderdi qabyldaý 10 tamyzǵa deıin júrgiziledi. Tolyq málimet Aqparat jáne qoǵamdyq damý mınıstrliginiń resmı saıtynda jarııalanǵan. «Daryn» syılyǵyna úmitkerlerge qoıylatyn negizgi talap – syılyq alýǵa ótinimderdi qabyldaý aıaqtalǵanǵa deıin jasy 29-ǵa tolmaǵan bolýy kerek. Úmitker jastardy ortalyq, jergilikti memlekettik organdar, oqý oryndary, shyǵarmashylyq uıymdar men qoǵamdyq birlestikter usyna alady», dedi mınıstrlik ókili.
Onyń aıtýynsha, syılyq aıasynda beriletin nomınasııa tizimi ózgerissiz qalǵan. «Baıqaý ádebıet, ǵylym, dızaın jáne beıneleý óneri, jýrnalıstıka, klassıkalyq mýzyka, qoǵamdyq qyzmet, sport, teatr jáne kıno, estrada, halyq shyǵarmashylyǵy syndy 10 nomınasııa boıynsha ótedi. О́zderińizge belgili, «Daryn» memlekettik jastar syılyǵy baıqaýyna talantty, shyǵarmashylyq, halyqaralyq jáne respýblıkalyq konkýrstar men festıvaldardyń, túrli sharalardyń laýreattary, respýblıkalyq jáne halyqaralyq deńgeıdegi sporttyq jarystardyń júldegerleri men jeńimpazdary, sondaı-aq túrli qalalarda qoǵamdy damytýǵa súbeli úles qosyp júrgen Qazaqstan Respýblıkasynyń 29 jasqa deıingi azamattary qatysa alady. Búginge deıin 294 adam «Daryn» memlekettik jastar syılyǵynyń ıegeri atandy», dedi Shahmardan Baımanov.
Brıfıngke Nur Otan partııasy janyndaǵy Jas Otan jastar qanatynyń tóraǵasy Nurjan Jetpisbaev ta qatysty. Jastar syılyǵynyń laýreaty retinde marapattyń artyqshylyqtaryna toqtaldy.
«Men «Daryn» syılyǵynyń ıegeri bolý úlken jaýapkershilikti talap etedi dep sanaımyn. О́ıtkeni munda úzdikter tańdalady. Tıisinshe árbir jeńimpaz óskeleń urpaqqa úlgi bolýy tıis. Konkýrsqa qatysýǵa nıet bildirgenderdiń sany jyldan-jylǵa artyp keledi, bul jastar arasyndaǵy básekelestiktiń óskenin aıǵaqtaıdy. Mundaı úrdis, shyn máninde, qýantady. О́zderine, ózderiniń ıgi isine, daǵdysy men bilimine senetin barlyq jasty ótinish bildirip, konkýrsqa qatysýǵa shaqyramyn», dedi spıker.
Nurjan Jetpisbaevtyń aıtýynsha, úmitker usynatyn qujat toptamasy kóp emes. Jeke kýáliktiń kóshirmesi, tirkeý ótinimi, qoldaýhat jáne jetistikter týraly anyqtama, marapattaý dıplomdarynyń, gramotalardyń, alǵys hattardyń kóshirmeleri, kandıdattyń nemese kandıdat týraly maqalalardyń, jarııalanymdardyń kóshirmeleri, kandıdattyń jetistikterin rastaıtyn ózge de materıaldar talap etiledi eken.
О́z salasynda top jarǵandarǵa «Daryn» memlekettik jastar syılyǵynyń laýreaty» ataǵy berilip, dıplom, tósbelgi jáne aqshalaı syıaqy tapsyrylady.
Al bıyldan bastap «Mereıli otbasy» ulttyq konkýrsy burynǵydan ózgeshe tártippen ótedi. Bıyl jetinshi ret ótkiziletin baıqaýdyń shartyn Ortalyq kommýnıkasııalar qyzmetinde ótken brıfıngte Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen aıtyp berdi.
«Alty jylda «Mereıli otbasy» konkýrsyna 15 197 otbasy qatysqan. Onyń 62 paıyzy aýyldyq jerlerde turady, bul konkýrs aýqymynyń keń ekenin kórsetedi. Qatysýshylardyń 36,3%-y – kópbalaly otbasy, 18%-y – jas otbasy, 17%-y – eńbek áýletteriniń ókilderi. Bıyl el Táýelsizdigine 30 jyl tolady. Osyǵan oraı elimizben birge ósip kele jatqan otbasy quryp, balaly bolǵan «táýelsizdik qurdastaryn» da baıqaýǵa qatysýǵa shaqyramyz. Olar jas otbasy, úlgili otbasy bolý úlgisin qoǵamǵa kórsete alady», dedi Lázzat Súleımen.
– Qazaqstan – otbasy saıasatyn tabandy júrgizip kele jatqan memleket. Otbasynyń ál-aýqatyn jaqsartý, ana men balanyń quqyǵyn qorǵaý, demografııalyq ósýdi yntalandyrý jáne kópbalaly otbasylardy qoldaý máseleleri árdaıym nazarda. Buǵan dálel retinde ulttyq bıýdjettiń 48%-y áleýmettik salaǵa bólinetinin aıta ketý kerek, – dedi spıker.
Aqparat jáne qoǵamdyq damý mınıstrligi Jastar jáne otbasy isteri komıtetiniń tóraǵasy Shahmardan Baımanov jańa erejelerdi tanystyrdy.
«Bıyl Úkimet qaýlysymen «Mereıli otbasy» ulttyq konkýrsyn ótkizýdiń jańa qaǵıdalary bekitildi. Ol boıynsha konkýrsty tanymal etý jáne úmitkerlerdiń sanyn ulǵaıtý úshin ótinimderdi otbasynyń ózderinen basqa, jergilikti atqarýshy organdar jáne zańdy tulǵalar engize alady. О́ńirlik kezeńniń barlyq jeńimpaz otbasysyn eńbek, sport, shyǵarmashylyq, zııatkerlik, ǵylymı jetistikterine saı, respýblıkalyq deńgeıde bir otbasyn ǵana tańdamaı, barlyq 17 otbasyna konkýrs laýreaty ataǵyn berý týraly sheshim qabyldandy. Konkýrs ádil ári ashyq ótýi úshin óńirlik komıssııalardyń quramyna azamattyq qoǵam ókilderi, ótken jyldardaǵy jeńimpazdardy qosý kózdelgen. Komıssııa otyrystary jergilikti atqarýshy organdardyń ınternet resýrstarynda jáne áleýmettik jelidegi resmı paraqshalarynda onlaın kórsetilim arqyly ótedi», dedi komıtet tóraǵasy.
Konkýrsqa qatysýǵa úmitkerler ótinimderin jergilikti komıssııalarǵa 15 maýsymǵa deıin joldaı alady. Konkýrs laýreattaryn saltanatty marapattaý rásimi qyrkúıek aıynyń ekinshi jeksenbisi – Otbasy kúni merekesi qarsańynda ótedi.
