Rıdderdegi alapat órttiń saldarynan baspanasyz qalǵan qala turǵyndarymen kezdesken Úkimet basshysy jaqyn arada olardyń jańa turǵyn úımen qamtamasyz etiletinin aıtty. Qurylys basynda bolyp, jumystyń sapasyna da nazar aýdardy.
– Memleket basshysy Qasym-Jomart Toqaevtyń tapsyrmasy boıynsha Rıdder qalasynda bolǵan órtten zardap shekken barlyq otbasy jaqyn arada jańa turǵyn úımen qamtamasyz etiledi. Úkimet pen Shyǵys Qazaqstan oblysynyń ákimdigi Memleket basshysynyń tapsyrmalaryn júzege asyrý úshin barlyq qajetti sharany qabyldap jatyr, – dedi Asqar Mamın.
О́rtten zardap shekken otbasylarǵa arnalǵan 30 jańa turǵyn úıdiń qurylysy tótenshe jaǵdaılar saldaryn joıý úshin qarastyrylǵan Úkimet rezerviniń qarajaty esebinen jańa «Botanıka úshinshi turǵyn úı aýdanynda» júrgizilýde. Ár úıdiń aýdany – 80 sharshy metr, al úı mańyndaǵy jeke ýchaske kólemi – 10 sotyq.
Aıta ketsek, Rıdder qalasynda bolǵan órttiń saldaryn joıý úshin 557,5 mln teńge bólingen. Qurylys jumystaryn «OblShyǵysJol», VK Invest Company, QK Sunqar, «Vostokvzryvprom», Kazprofstroy Holding kompanııalary júrgizip jatyr.
Josparǵa sáıkes úılerdiń qurylysy osy jyldyń 15 tamyzyna qaraı aıaqtalady. Úıdiń ózi ǵana emes, sonymen qatar barlyq qajetti ınjenerlik-kommýnıkasııalyq ınfraqurylymy tolyqtaı júrgiziledi.
Budan keıin A.Mamın attyń basyn oblystyń kólik ınfraqurylymy, taý-ken metallýrgııa ónerkásibi, agroónerkásiptik keshen nysandaryna burdy. Densaýlyq saqtaý salasyndaǵy iri ınvestısııalyq jobalardyń iske asyrylýyn da nazardan tys qaldyrmady.
Aıagóz qalasynda Úkimet basshysyna «Taldyqorǵan – О́skemen» (768 km), «Qalbataý – Maıqapshaǵaı» (415 km) jáne «Úsharal – Dostyq» (180 km) avtomobıl joldaryn rekonstrýksııalaý barysy týraly baıandaldy. Osy tusta Premer-Mınıstr Shyǵys Qazaqstan jáne Almaty oblystarynyń joldaryndaǵy qurylys jumystarynyń qarqynyn arttyrýdy tapsyrdy. Ras, bul baǵyttardaǵy jumystyń sylbyr ekendigin «QazAvtoJol» UK» AQ ókilderi de moıyndaǵan. Bul rette Úkimet basshysy qurylyp jatqan kólik ınfraqurylymynyń sapasyn qamtamasyz etýdiń jáne ony ýaqtyly paıdalanýǵa berýdiń mańyzdylyǵyn atap ótti.
Sonymen qatar Aıagóz aýdanynda A.Mamın KAZ Minerals Aktogay JShS keńeıtý jobasymen tanysty. Bıyl sýlfıdti kendi óńdeıtin Aqtoǵaı II baıytý fabrıkasynyń qurylysyn aıaqtaý josparlanǵan. Investısııa kólemi 514,6 mlrd teńgeni (1,2 mlrd dollar) quraıdy. Belgili bolǵandaı, 1 myń jańa jumys orny qurylady. Jobany iske asyrý 2022-2027 jyldary kásiporyn óndiretin mys kólemin jylyna 125 myń tonnadan 200 myń tonnaǵa deıin ulǵaıtýǵa jáne kenishti álemdegi eń iri ken oryndarynyń qataryna shyǵarýǵa múmkindik beredi. Aqtoǵaı ken ornynda oksıdti kenderdi qaıta óńdeý kesheni de jumys isteıdi, onda 2024 jylǵa deıin jyl saıyn 20 myń tonna katodty mys óndirýdi qamtamasyz etý josparlanyp otyr.
Sapar barysynda Úkimet basshysy Glýbokoe aýdanynyń Solnechnoe aýylynda «Maıly daqyldardyń tájirıbelik sharýashylyǵy (MDTSh)» JShS taýarly sút fermasyn, egis alqaptaryn jáne aýyl sharýashylyǵy tehnıkalaryn da qarap shyqty.
Byltyr taýarly sút fermasy 13 myń tonna sút jáne 300 tonna sıyr etin óndirdi. О́ndiristi jańǵyrtý aıasynda 2022-2025 jyldary jalpy sút saýýdy táýligine 40 tonnadan 100 tonnaǵa deıin arttyrý josparlanýda. Aıta ketsek, MDTSh – respýblıkadaǵy aldyńǵy qatarly tuqym ósirý sharýashylyqtarynyń biri. О́tken jyly aýyl sharýashylyǵy daqyldarynyń tuqymdaryn satý boıynsha seriktestik 1-orynǵa ıe boldy (10 myń tonna tuqym). Sońǵy bes jylda barlyq ósiriletin aýyl sharýashylyǵy daqyldary boıynsha ortasha ónimdilik gektaryna 4,3 tonnany qurady. Kásiporyn Solnechnoe aýylynda jalpy aýdany 3,7 myń sharshy metr az qabatty turǵyn úıler keshenin salý arqyly «Aýyl – el besigi» jobasyn iske asyrýǵa belsendi qatysyp keledi.
Premer-Mınıstr Semeı qalasynda da boldy. Munda Qazaq astyq group JShS maı ekstraksııalyq zaýytynyń kúnbaǵys tuqymyn qaıta óńdeý jelisin iske qosty. Investısııanyń jalpy somasy 13 mlrd teńgeni quraıdy. Kásiporyn táýligine 1 myń tonna kúnbaǵys tuqymyn nemese 800 tonna raps tuqymyn qaıta óńdeýge qaýqarly. Jańa iske qosylǵan kásiporynda 300-den astam turaqty jumys orny ashyldy. Zaýyt elimizdiń ósimdik maıyna degen ishki qajettiligin qamtamasyz etip ǵana qoımaı, ónimderi syrtqy naryqqa da eksporttalmaq.
Budan keıin A.Mamın «Semeı qalasynyń ıadrolyq medısına jáne onkologııa ortalyǵyna» bardy. Atalǵan ortalyq Qazaqstandaǵy radıofarmpreparattar óndirýden jáne ony onkologııalyq aýrýlardy erte dıagnostıkalaýda qoldanatyn, pasıentterge radıonýklıdtik terapııa júrgizýge deıingi tolyq sıkldi ıadrolyq medısınanyń jalǵyz medısınalyq mekemesi.
Úkimet basshysy sondaı-aq Qazaqstanda alǵash ret balalar men eresekterdi ońaltý tehnologııasy – h/p/cosmos locomotion qoldanylǵan iv plus klınıkasynyń qyzmetimen tanysty. Ol aǵzanyń fızıologııalyq jáne motorlyq fýnksııalaryn qadaǵalaýdyń elektrondyq júıelerin paıdalanatyn sıfrly platformadaǵy elimizdegi alǵashqy medısınalyq ońaltý ortalyǵy ekenin eske sala keteıik.
Jalpy, Shyǵys Qazaqstannyń ekonomıkasynda ilgerileý bar. Bıylǵy tórt aıdyń qorytyndysy boıynsha oblysta ónerkásip óndirisiniń kólemi 2020 jyldyń osy kezeńimen salystyrǵanda 6,7%-ǵa – 860,8 mlrd teńgege deıin ósti. Aýyl sharýashylyǵynyń jalpy óniminiń kólemi 93,8 mlrd teńgeni (+2,1%), qurylys jumystarynyń kólemi – 51,6 mlrd teńgeni (+5,6%) qurady. Negizgi kapıtalǵa salynǵan ınvestısııalar 177,6 mlrd teńgege jetti (+6,8%).
Úkimet basshysynyń shyǵysqa jasaǵan jumys saparyna oblys ákimi Danıal Ahmetov, Indýstrııa jáne ınfraqurylymdyq damý mınıstri Beıbit Atamqulov, Aýyl sharýashylyǵy mınıstri Saparhan Omarov, Qarjy mınıstri Erulan Jamaýbaev, Densaýlyq saqtaý mınıstri Alekseı Soı jáne Tótenshe jaǵdaılar mınıstri Iýrıı Ilın qatysty.
Shyǵys Qazaqstan oblysy
