«Jasyl aımaq» ekenbiz dep jaıbaraqat júrýge áste bolmaıdy. Dendegen dert tanaýdyń astynda ǵana. Onyń ústine, Shyǵys Qazaqstan týrıstik-rekreasııalyq aımaq bolǵandyqtan, ala jazdaı saıahatshylardyń legi úzilmeıdi. Iаǵnı álemdi jalmaǵan jaman aýrýdyń taralý múmkindigi de kóbeıe túspek. Ondaıda ár adam sanaly túrde saqtana túskeni abzal. Týrıstik aýmaqtarda saqtyqty kúsheıtip, qaýiptiń aldyn alý úshin memleket tarapynan da sharalar qolǵa alynǵan. Aıta ketsek, 23 mamyrda Shyǵys Qazaqstan oblysynyń bas memlekettik sanıtarlyq dárigeri «Buqtyrma sý qoımasynyń, Alakóldiń jáne Rahman qaınary sanatorııiniń týrıstik-rekreasııalyq aımaqtarynda COVID-19 koronavırýs ınfeksııasy aýrýynyń ákelinýi men taralýynyń aldyn alý jónindegi sharalar týraly» №7 qaýlyǵa qol qoıdy.
Qaýlyda aıtylǵandaı, 1 maýsymnan bastap týrıstik-rekreasııalyq aımaqtarda kúsheıtilgen sanıtarlyq dezınfeksııalyq rejimdi, termometrııany, betperdelik tártipti jáne áleýmettik qashyqtyqty saqtaı otyryp, adamdardy ornalastyrý jáne demalý oryndaryn jazǵy týrıstik maýsymǵa daıyndaýǵa ruqsat berildi. Alaıda nysandardyń qyzmetin qaıta bastaý úshin bekitilgen birqatar ereje bar. Birinshiden, demalys oryndarynyń ıelerine InfoKazakhstan.kz saıtynan elektrondy formatta beriletin «Sanıtarlyq normalarǵa sáıkestik aktisi» qajet. Sonymen qatar shekteý sharalary jaǵdaıynda jazǵy týrıstik maýsymdy ashýǵa beriletin «daıyndyǵy týraly akti» jáne bar.
Bas sanıtarlyq dáriger bekitkendeı, demalys oryndarynda Ashyq jobasyn da iske qosý qajet. Máselen, menshik ıeleri demalys bazasyna kelgen meımandy «jasyl/kók» statýsqa tekserip otyrsa ǵana, jumystaryn jalǵastyrýǵa ruqsat beriledi. Atap aıtsaq, Buqtyrma sý qoımasynyń, Alakóldiń, Rahman qaınarynyń aýmaǵyndaǵy qyzmet kórsetý nysandarynda Ashyq jobasyn engizip, kelýshilerdi jiti qadaǵalap otyrǵan jón.
Shyǵys Qazaqstandaǵy demalý, saýyqtyrý oryndarynda tynyǵyp qaıtamyn degen azamatqa, berilgen kúninen bastap úsh táýlikten (72 saǵat) aspaıtyn teris nátıjesi bar PTR ádisimen tekserilgen zerthanalyq qujat qajet. Odan bólek, COVID-19 koronavırýs ınfeksııasyna qarsy vaksınalaýdyń tolyq kýrsyn alǵanyn rastaıtyn qujattyń bolýy shart. Eskerte keterligi, «sary/qyzyl» statýsy bar jeke tulǵalarǵa týrıstik-rekreasııalyq aımaqtarǵa kelýge tyıym salynady.
– Árıne, aýdan ekonomıkasy úshin saıahatshylardyń kelip jatqany jaqsy. Alaıda biz turǵyndardyń densaýlyǵyn birinshi orynǵa qoıýymyz kerek. Bul úshin oblystyq bas sanıtarlyq dáriger bekitip bergen qaýly negizinde jumys atqarýymyz kerek. Aýdandaǵy demalys bazalary kelýshilerdi belgilengen erejege saı qabyldap qana qyzmet kórsete alady. Buǵan halyq túsinistikpen qarasa eken deımiz. Atqarylyp jatqan sharanyń bári siz ben bizdiń qaýipsizdigimiz úshin, – deıdi Altaı aýdanynyń ákimi Qalıhan Baıǵonysov.
«Tártipke baǵynǵan qul emes». Bekitilgen erejeni bir kisideı saqtaýymyz kerek. Aıtqandaı, sanıtarlyq talaptardyń oryndalýyn arnaıy jasaqtalǵan monıtorlyq top kúndelikti qadaǵalap otyrady. Ereje eskerilmegen jaǵdaıda, belgili mólsherde aıyppul salý kózdelgen. Halyq osyny da esten shyǵarmaǵandary abzal.
Bir jaǵynan óńir «jasyl aımaqqa» ótip, birqatar shekteýge ózgerister endi. Oblystyq sanıtarlyq-epıdemıologııalyq baqylaý departamentiniń basshysy Qanat Turdıevtiń aıtýynsha, «jasyl aımaqqa» jatatyn qalalar men eldi mekenderde erteńnen bastap meıramhanalar, dámhanalar men jazǵy alańdar túngi saǵat 02:00-ge deıin jumys isteýge ruqsat berildi. Elýden artyq adam qatyspaǵan jaǵdaıda, eske alý túski astaryn ótkizýge de ruqsat etiledi. Sondaı-aq meshit, shirkeý, sınagoga syndy dinı nysandarda is-sharalar ótkizýge ruqsat etiledi. Biraq qatysýshylardyń sany 100 adamnan aspaýy tıis. «Jasyl aımaqtaǵy» eldi mekender úshin bılıard, boýlıng, oıyn klýbtary, balalar oıyn-saýyq ortalyqtary, sonyń ishinde jabyq bólmelerdegi attraksıondar jumysyn qaıta bastaıdy.
Esterińizge taǵy bir márte sala ketsek, О́skemen, Semeı jáne Aıagóz aýdandary «sary aımaqta». Sondyqtan joǵaryda atalǵan jeńildikterdiń bul óńirlerge qatysy joq. Demek mundaǵy jabyq úı-jaılaryndaǵy is-sharalar men eske alý túski astaryna áli de tyıym salynǵan. Bılıard, boýlıng, oıyn klýbtary men balalar ortalyqtary da áli jumys isteı almaıdy. Al Ashyq jobasy engizilgen nysandar belgilengen rejimde jumys isteýge quqyly.
Shyǵys Qazaqstan oblysy
