Kezdesýde Qazaqstannyń tuńǵysh Prezıdenti memleketaralyq dıalogty nyǵaıtýdyń mańyzdylyǵyna toqtaldy. Sondaı-aq Azııadaǵy ózara is-qımyl jáne senim sharalary jónindegi keńestiń bolashaǵy, onyń Azııa men búkil dúnıe júzindegi yntymaqtastyq pen qaýipsizdikti nyǵaıtýdaǵy róli týraly pikirin aıtty.
«1992 jyly, elimiz táýelsizdik alǵannan keıin bir jyl ótken soń men Birikken Ulttar Uıymynyń minberinen osy Keńes týraly ıdeıamdy aıttym. Alǵashqy sammıt 2002 jyly Almatyda ótti. Azııadaǵy ózara is-qımyl jáne senim sharalary jónindegi keńeske basqa elderdiń qyzyǵýshylyǵy qazir de joǵary. Bıyl mınıstrler deńgeıindegi kezdesý ótedi, al keler jyly Keńestiń 30 jyldyǵyna oraı VI sammıtti ótkizý josparlanyp otyr. Osy oqıǵalarǵa sapaly daıarlyqty qamtamasyz etý mańyzdy», dedi Elbasy.
Q.Sarybaı Nursultan Nazarbaevqa Qazaqstannyń Azııadaǵy ózara is-qımyl jáne senim sharalary jónindegi keńes tóraǵalyǵyndaǵy basymdyqtary men bastamalaryn júzege asyrý boıynsha Hatshylyqtyń atqaryp jatqan jumysy týraly baıandady. Negizgi basymdyqtardyń biri retinde Keńesti Azııadaǵy tolyqqandy óńirlik qaýipsizdik uıymyna aınaldyrý prosesi aıtyldy.
Atqarýshy dırektor Q.Sarybaıdyń aıtýynsha, qazirgi tańda Azııadaǵy ózara is-qımyl jáne senim sharalary jónindegi keńesti aıtarlyqtaı qurylymdyq ózgerissiz jáne barlyq irgeli prınsıpteri men maqsattaryn saqtaı otyryp uıymǵa aınaldyrýǵa múmkindik bar.
Usynylǵan aqparattarǵa sáıkes, Azııadaǵy ózara is-qımyl jáne senim sharalary jónindegi keńestiń qaıta qurylýy osy qurlyq aýmaǵynyń 90 paıyzǵa jýyǵyn qamtıtyn 27 múshe memleket arasyndaǵy yntymaqtastyqty damytyp qana qoımaı, Azııanyń jahandyq qaýipsizdikti qamtamasyz etýdegi rólin kúsheıtedi. Sońynda Nursultan Nazarbaev Azııadaǵy ózara is-qımyl jáne senim sharalary jónindegi keńestiń odan ári damýyna qoldaýyn bildirdi.
