Bilim jáne ǵylym mınıstri Ashat Aımaǵambetov 2021 jylǵy 11 naýryzdaǵy Úkimet otyrysyndaǵy baıandamasynda: «Daryndy balalardy qoldaý jumystaryn jalǵastyramyz. «Myń bala» jobasy jalǵasady, Respýblıkalyq olımpıadanyń, Prezıdenttik olımpıadanyń jańa úlgileri engiziledi. Oǵan qosa, jaqynda qabyldanǵan zańnyń sheńberinde qosymsha bilim alýǵa keń múmkindik berý úshin memlekettik tapsyrys konkýrstyq negizde jáne jekemenshik uıymdarda da ornalasatyn bolady. Sonyń nátıjesinde 2025 jyly bul kórsetkish 100 paıyzǵa deıin jetedi. Bes jyldyń ishinde barlyq mektepte sportpen aınalysýǵa jaǵdaı jasalady. Sondaı-aq dene shynyqtyrý muǵalimderine seksııalar men úıirmeler ótkizgeni úshin aı saıyn qosymsha 17 myń teńge aqy tólenedi», degen edi.
Mınıstrliktiń qosymsha bilim berýdiń kókjıegin keńeıtýge qatysty bastamasyn óńirlik ákimdikter de qoldaı bastaǵan syńaıly. Elorda ákimi Altaı Kólginov óziniń áleýmettik jelidegi paraqshasynda balalardy qosymsha bilimmen qamtý jumystary qalaı júrgizilip jatqanyn jazdy.
«Sapaly bilim berý men oqýshylardyń jan-jaqty damýy úshin mektepterdi salyp, olardy jóndeýden basqa, qosymsha bilim berýdi damytýǵa erekshe nazar aýdarý qajet. Memleket basshysynyń tapsyrmasyna sáıkes balalardy qosymsha bilimmen barynsha qamtý boıynsha jumystar júrgizilip jatyr. Balalardyń sporttyq, shyǵarmashylyq jáne zııatkerlik áleýetin iske asyrýy mańyzdy. Birqatar kópbeıindi qosymsha bilim berý ortalyqtarynyń jumys barysymen tanystym. Onyń ishinde Jeleznodorojnyı eldi mekeninde ornalasqan tehnıkalyq shyǵarmashylyq ortalyǵy bar. Ǵımarat buryn bos tursa, qazir jóndelip, qosymsha bilim beretin ortalyqqa aınaldy (J.Jabaev kóshesi, 27). Atalǵan qosymsha bilim berý ortalyǵynda robottehnıkamen, avıamodeldeýmen, tehnıkalyq dızaınmen, qolónermen, motokrospen jáne t.b. aınalysý úshin barlyq jaǵdaı jasalǵan. Ortalyqtyń 30-dan astam fılıaly jumys isteıdi. Olar qala ishinde de, eldi mekenderde de ornalasqan. 7 jastan 18 jasqa deıingi balalar ortalyqqa tegin bara alady», deıdi bas qalanyń ákimi.
A.Kólginov óziniń jazbasynda taǵy M.О́temisov atyndaǵy Oqýshylar saraıynda (Á.Mámbetov kóshesi, 1) jóndeý jumystary júrgizilip, qosymsha úıirmeler ashylǵanyn tilge tıek etken. Onyń aıtýynsha, onda kórkem jáne áleýmettik shyǵarmashylyqty, dene shynyqtyrý men sportty damytý úshin barlyq jaǵdaı jasaldy. Ortalyqta lıngvıstıka, dombyra, shahmat, toǵyzqumalaq, robottehnıka, vıdeografıka, sport seksııalary (basseın, basketbol) jáne t.b. kabınetter bar.
«Balalardy qosymsha bilimmen qamtýda aýla klýbtary da kómektesedi. Búginde Nur-Sultanda 28 aýla klýby jumys istep tur, al ondaǵy tárbıelenýshileriniń sany shamamen 3 myń balany quraıdy. Jáne bıyl qosymsha jańa Oqýshylar saraıy ǵımaratynyń qurylysyn bastaımyz», dedi elorda ákimi.
