Quryltaıda Qazaqstannyń Ýkraınadaǵy elshisi Darhan Qaletaev quttyqtaý sóz sóılep, aǵaıyndarǵa atajurttyń ystyq sálemin jetkizdi.
Atalǵan is-sharaǵa Ýkraınanyń etnosaıası jáne ar-ojdan bostandyǵy jónindegi memlekettik qyzmetiniń tóraǵasy Elena Bogdan, L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov jáne Ýkraına Joǵarǵy Radasynyń halyq depýtaty, Qazaqstanmen yntymaqtastyq jónindegi parlamentaralyq toptyń múshesi Sergeı Nagornıak arnaıy qatysty.
Quryltaıdyń ekinshi bóliminde Kıev qalasyndaǵy «Dostyq» Qazaq mádenı qoǵamynyń basshysy Danııar Egamberdıev, Harkov qalasyndaǵy ulttyq «Birlik» QB basshysy Makka Qarajanova jáne qazaq dıasporasynyń ókili Rústem Janǵoja shettegi aǵaıyndar atynan sóz sóılep, atajurtpen aradaǵy rýhanı, mádenı, ekonomıkalyq baılanystardyń artýyna kúsh salatyndaryn aıtty. Sondaı-aq eki eldiń tatýlyǵynyń arqasynda talaı belesterdi baǵyndyratynyna senim bildirdi.
Etnostyq óner qaıratkerleri qaýymdastyǵy basqarmasynyń prezıdenti, Ýkraınanyń eńbek sińirgen ártisi Inesh Kdyrova óz sózinde ýkraın jáne qazaq halyqtarynyń berik dostyq qarym-qatynasyna rızashylyǵyn jetkizdi.
Sonymen qatar quryltaı sońynda jańa qaýymdastyq basshysy saılanyp, osyǵan deıin atqarylǵan baǵdarlamalar men jobalarǵa qatysty usynys-pikirler talqylandy jáne dúnıe júzindegi qazaqtarǵa Qazaqstan Táýelsizdiginiń 30 jyldyǵy men elde júrgizilip jatqan túrli reformalarǵa qoldaý bildirilgen arnaıy úndeý joldandy.
Odan bólek, qoǵamdyq jumysqa belsene aralasqan aǵaıyndar Qazaqstannyń Ýkraınadaǵy elshisi men «Otandastar qorynyń» alǵys hatymen marapattaldy.
