– Dóńgelek ústelde Álıhan Bókeıhan týraly birsypyra tyń maǵlumat-derekter, ǵylymı paıymdar men pikirler aıtyldy. Alash kósemi, birinshiden, Torǵaı oblysy Qostanaı ýeziniń Reseı quramyna ótip ketýine jol bermeı, Qazaqstannyń aýmaǵynda qalýyna ólsheýsiz eńbek sińirgen qaıratker.
Muny otyrys barysynda belgili álıhantanýshy Sultan Han Aqqululy naqty bultartpas derektermen negizdeı otyryp baıandap berdi. Ol kisiniń aıtýynsha, Kerenskııdiń ýaqytsha úkimeti Álıhandy Torǵaı oblysynyń komıssary etedi. О́ıtkeni bul jaqta jaǵdaı óte kúrdeli edi. Sebebi ishki Reseıden tolassyz aǵylyp kelip, osynda ornyǵyp qalyp jatqan qonys aýdarýshylardyń úles salmaǵy artyp bara jatty. Sol kezde Álıhan osy jerge komıssar bolyp kelip, ata qonysyn tastap ketken qazaqtardy mekenine qaıtaryp, tepe-teńdikti jónge keltiredi. Ekinshi, Álıhan Bókeıhan budan buryn Tobyl ekspedısııasy men Sherbınanyń ekspedısııasyna qatysady. Sol ekspedısııalardyń nátıjesinde Qazaq dalasynda tuńǵysh ret jer alýdyń zańdyq negizdemesi jasalady. Buryn qonys aýdarýshylar ózine unaǵan jerdi jalǵa alǵan, qýlyq-sumdyqpen, tipti áli jetse tartyp alyp otyrǵan ǵoı. Úkimet osy ekspedısııa jumysynyń nátıjesinde qazaqtardy jermen qamtamasyz etý jóninde norma belgileıdi. Ol norma búgingi jerimizdiń saqtalyp qalýyna áser etedi. Sol kezde «Norma zemelnogo polzovanııa Torgaıskoı oblastı» degen kitap ta shyǵady. Sherbına ekspedısııasynyń nátıjesinde ár bolystyń jeri belgilenip, aýmaqtyq shekara aıqyndalady, – dedi Qostanaı óńirlik ýnıversıteti «Rýhanı jańǵyrý» keńsesiniń jetekshisi Almasbek Ábsadyq.
