Dýbaı sharshy alańyndaǵy jartylaı fınal básekelerinde Danııal Sábıt (49 kg), Abylaıhan Júsipov (69 kg), Amanqul Ábilhan (75 kg), Vasılıı Levıt (91 kg) jáne ulttyq qurama kapıtany Qamshybek Qońqabev (+ 91 kg) qarsylastarynan basym túsip, altyn júlde úshin ótetin jekpe-jekke joldama alǵan-dy.
О́kinishke qaraı, 52 kıloda judyryqtasatyn Sáken Bıbosynov fınalǵa shyǵa almady. Tokıo Olımpıadasyna joldama jeńip alǵan jerlesimiz jartylaı fınalda Azııanyń birinshi nómirli boksshysy Amıt Pangalmen kezdesip, bul joly da úndistandyq sańlaqtyń osal tusyn taba almady. 2019 jyly Reseıde ótken álem chempıonatynyń jartylaı fınalynda jerlesimizdiń jolyn kesken Amıt ótken jekpe-jekte de Bıbosynovtyń adymyn ashtyrmaı, sary qurlyq birinshiliginde altyn alamyn degen armanyn eki jyl keıinge shegerdi. Sóıtip jerlesimiz qatarynan eki iri týrnırde Pangaldan jeńilip, qola júldeni qanaǵat tutýǵa májbúr boldy. Endi eki boksshynyń joly aldaǵy Tokıo Olımpıadasynda túıisýi múmkin. Eger soqyr jerebe ekeýin úshinshi márte Olımpııa oıyndarynda jolyqtyryp jatsa, Bıbosynov qalaıda jeńiske jetýi tıis.
Osy Azııa chempıonatyna úlken úmitpen ákelip, aıbynymyzdy asqaqtatady dep sengen biraz jigitterimiz ekinshi aınalymǵa jetpeı súrinip, jankúıerler úmitin aqtaı almaı uıatty bolyp jatqanda, eń jeńil salmaqtaǵy boksshymyz Danıal Sábıt (49 kg) óziniń alǵashqy Azııa chempıonatyna qatysyp jatqanyna qaramastan fınaldan bir-aq shyqty. Byltyr el chempıonatynda 2013 jylǵy Azııa chempıony, Qazaqstannyń bes dúrkin chempıony Temirtas Júsipovti jeńip, 49 kıloda elimizdiń úzdik boksshysy atanǵan D.Sábıt qurlyqtyq týrnırdiń jartylaı fınalynda fılıppındik Mark Lester Dýrsansty tize búktirdi. 19 jastaǵy jerlesimiz úshin bul úlken jetistik.
Danıal fınalda 2019 jyly Taılandta ótken Azııa chempıonatynda bas júldeni oljalaǵan ózbekstandyq Nodırjon Mırzahmedovpen judyryqtasady. О́zbek boksshysy jartylaı fınalda mońǵolııalyq Ýnýbold Orhontýngalagty 5:0 esebimen jeńdi.
69 kılo salmaq dárejesinde óner kórsetken Abylaıhan Júsipov jartylaı fınalda mońǵolııalyq Battýmýr Mısheltge esh múmkindik qaldyrmady – 5:0. Ár raýndta qajetti upaı jınap otyrǵan Júsipov asa qınala qoıǵan joq. 2017 jáne 2019 jylǵy álem chempıonatynyń qola júldegeri fınalda taǵy bir ózbekstandyq boksshy Bobo-Ýsmon Batýrovpen kúsh synasady. Batýrov 2018 jyly Azııa oıyndarynda, 2019 jyly Azııa chempıonatynda úzdik shyqqan. Bobo-Ýsmon Azııa oıyndarynyń fınalynda jerlesimiz Aslanbek Shymbergenovten aılasyn asyryp ketken bolatyn.
75 kılodaǵy úzdigimiz Ábilhan Amanqul da Azııa chempıonatynyń fınalyna joldama aldy. Jartylaı fınalda ol ırandyq Seıedshahın Mýsavıden 5:0 esebimen basym tústi. Altyn júlde úshin ótetin aıqasta Amanqul Azııa chempıonatyna tuńǵysh ret qatysyp jatqan ózbekstandyq Saıdjamshıd Jafarovpen kezdesedi. О́z kezeginde Jafarov jartylaı fınalda qazaq boksshylary úshin alynbaıtyn qamalǵa aınalǵan Fılıppın ókili Eýmır Felıks Marsıaldy tize búktirdi. Buǵan deıingi Azııa birinshiliginiń kúmis jáne qola júldesin jeńip alǵan jerlesimizge endi sary qurlyqtyń altyny jetpeı tur. Búgin sol olqylyqtyń ornyn toltyratyn tamasha múmkindik.
91 kılo salmaqtaǵy boksshymyz Vasılıı Levıt óziniń Azııa chempıonatyndaǵy tórtinshi fınalyna shyǵyp otyr. Jartylaı fınalda ol qyrǵyzstandyq Rýstam Yrysbek ýýlyn jeńdi. Yrysbek tegeýrindi qarsylyq kórsetkenimen, Levıttiń soqqylary dálirek boldy. Osydan keıin-aq kimniń jeńiske jetetini birden baıqaldy. Levıtti fınalda úndistandyq Sanjıt kútip tur. Eger jerlesimizdiń bul jekpe-jekte de mereıi ústem bolsa, Azııa chempıonatynda tórt márte top jarǵan tuńǵysh qazaqstandyq boksshy atanady.
Ulttyq quramanyń kapıtany Qamshybek Końqabaev Qazaqstan quramasynyń besinshi joldamasyn jeńip aldy. 91 kılodan joǵary salmaqta sharshy alańǵa kóterilgen Końqabaev jartylaı fınalda ırandyq Pýrııa Amırıdi jeńdi – 5:0. Otandasymyz ekinshi raýndta qarsylasyn bir márte nokdaýnǵa túsirdi. Fınalda Qamshybek ózbekstandyq Bahodır Djalolovpen kezdesedi. Bul eki boksshy arasyndaǵy jetinshi jekpe-jek. Buǵan deıin alty kezdesýde boksshylar úsh márteden jeńiske jetken. Búgingi fınalda jeńiske jetken boksshy Azııa chempıonatynyń altyn júldesin enshilep qana qoımaı, jeke kezdesý boıynsha alǵa shyǵyp alady.
