Modern mahabbat

Eger, osy serıaldy kórýdiń qajeti bar ma dep surar bolsańyz, jaýap – kórýge ábden turady. Ár epızod jeke-jeke oqıǵany arqaý ete otyryp, ondaǵy keıipkerlerdiń taǵdyr tala­­ıyndaǵy oı aǵymyn, kóńil-kúı quby­lysyndaǵy ózgerister men bas­tan ót­kergen ishki shyndyǵy jaıynda baıan­dalatyn 8 se­rııadan turady. Al eń sońǵy segizinshi bólim aldyńǵy epı­zod­tardaǵy oqıǵalardyń basyn birik­tirýge tyrysady. Bul Nıý-Iork Taıms jýrnalynyń «Qazirgi mahabbat» baǵa­nyndaǵy keıipkerler ómirinen alynǵan shaǵyn nobaılar.

Fılmde sana men emosııalyq ún­des­­tikke shaqyratyn serpilis bar, jaman­dyqty jaqsylyqqa, zulymdyqty izgi­likke aınaldyrý óz qolyńda degen órken­deý jolyna umtyldyryp otyrady. Bir qaraǵanda qarapaıym adamdardyń kún­de­likti qyńqyl-syńqyly, kúńkil-shúń­kili syndy mańyzdy kórinbeýi múm­kin, biraq ózimiz kúrdelendirip alǵan ómirimizdegi quldyraý, qaıta turý, kóz jasy, jan qınalysy, kóńil tol­qy­nysy syndy belesterdi uqypty kórsete bilgen. Máselen, balalar men ata-analardyń qarym-qatynasy, eresek erli-zaıyptylardyń qarym-qatynasy, aralasýdaǵy qatelikter, mahabbat, dos­tyq, ózine degen senimsizdik syndy alýan túrli taqyryp ǵylymı tu­jyrymdarmen órile otyryp, qamtylǵan.

Fılmniń bir jerinde ózińizdi tanyp jatsańyz, kezekti bir tusynda keıip­kerlerdiń áreketine qýanyp otyrar edińiz. Keıipkerler arasyndaǵy qıyn­dyqtarǵa qaramastan, fılm aýa­ny­nan sezilip turatyn jeńildik pen áýeni janǵa jaǵymdylyǵymen este qa­la­dy.  Al fılmdegi mıllıondardy qym­­synbaı qushaǵyna alyp jatqan zor Nıý-Iorktiń bas aınaldyrar ǵajaıyp kó­ri­nisteri birden kórermenniń kóńilin jaýlap alady. 

Zamanaýı mahabbat – qarapaıym adamdardyń qatynasy. Oǵan bola sýper qaharman bolýdyń, aqyldy áldeneni oılap tabýdyń esh qajettiligi joq. Bul kez kelgenimizdiń basymyzǵa túsýi ábden múmkin ómir jolaqtary. Eńseńiz túsip, kóńilińizdi torlaǵan sur bulttan aryla almaı júrgen bolsańyz, osy fılmdi qarap kórińiz. О́kinbeısiz, ishińizdegi jan saraıyńyz shaıdaı ashylady. Bul – ómir jolymyzdyń san alýan qyryn jan-jaqty ashyp beretin, eń bastysy ótken de, erteń de emes, qazirgi ýaqyt ekenin eske salatyn fılm. Barlyǵyn óz ýaǵynda qadirleý kerek, qasterleý kerek, qamqorlyq kórsetip, jaqsy kórý kerek. Ondaı bolmaǵan kúnde «ishimdegini tap» degen únsizdik naǵyz betperdege aınalady da, qurdymǵa qulata jazdaıdy. Esesine aıtý, sózben uǵynysý baıypty baılamǵa kelýdiń tamasha quraly degen oıdy jetkizgisi keledi.

Tym tereńge ketken kommýnıka­sııalyq daǵdy osy kúni telefonnan bas kótertpeıdi. Is júzinde jas­tar «Badoo» men «Tinder» sııaqty qosymshalarda, jarq-jurq etken ıns­tagram jelilerinde ýaqyt ótkizedi. Aınalańa bir ýaq zer salsań basyn salbyratqan qaýym únemi tómen qaraǵan kúıinshe eshkimdi, eshteńeni baıqamastan ketip bara jat­qany. Kimnen ne jasyrǵysy keledi, álde kimnen jasyrynǵysy keledi, beımálim. Nemquraıdy júristiń syr­tynda ómir jylystap ótip bara jatqanyn uǵynsa ǵoı, basyn kóterip, aspanǵa birer sát kóz toqtatsa ǵoı deısiń. Adam balasyna bir ret beriletin ómir kóptegen jasyryn múmkindikter men qaýip-qaterlerge toly qııal ma deısiń. Biri ómirdi sheksiz unatyp jatsa, biri jek kóredi. Sonyń arasynda modern mahabbattan mán tapqymyz-aq keledi. Sheksiz-shetsiz ómir aǵysynda áldeqalaı toǵysqan taǵdyrlardyń endigi betalysy jum­baq.