Osy oraıda, búgin aımaqta «Qarasora-2021» jedel-profılaktıkalyq is-sharasy bastaldy. Atalǵan shara aǵymdaǵy jylǵy 1 maýsym men 31 qazan aralyǵynda ótkiziledi.
Jambyl oblystyq Polısııa departamentiniń bastyǵy, general-maıor Janat Súleımenovtiń aıtýynsha, jedel aldyn alý is-sharasy bastalǵanǵa deıin birneshe kún buryn osyndaı keń aýqymdy is-sharaǵa daıyndyq máseleleri boıynsha Shý aýdanynda keńes ótken. Keńeste alǵa qoıylǵan mindetter anyqtalyp, jedel is-qımyldardy uıymdastyrý boıynsha nusqaýlar berilgen. Sonymen qatar, jumysqa barlyq vedomstvolyq qurylymdar jumyldyrylǵan. «Jyl saıyn polıseıler Jambyl oblysynyń qumdy aımaqtarynan basqa óńirlerge jabaıy qarasorany shyǵarý arnalaryn jabý boıynsha operasııalar júrgizedi», dep atap ótti general-maıor Janat Súleımenov.
О́tken jyly «Qarasora-2020» jedel-aldyn alý is-sharasynyń qorytyndysy boıynsha 574 esirtki quqyq buzýshylyǵy anyqtalǵan. Onyń ishinde 139 derek esirtki qylmysy, 435 derek qylmystyq teris qylyq tirkelgen. Esirtki qylmystarynyń ishinde esirtkini ótkizýdiń 73 deregi, 38 derek ony asa iri mólsherde saqtaý, 3 derek esirtki kontrabandasy jáne 25 quramynda esirtki bar ósimdikterdi ósirý deregi anyqtalǵan. Zańsyz aınalymnan 2 tonna 867 keli túrli esirtki quraldary tárkilengen.
Esirtki qylmysyna qarsy is-qımyl basqarmasynyń qyzmetkerleri men jergilikti atqarýshy bıliktiń ókilderi birlesip, esirtkini órteý, shabý, jerdi aýdarý, sondaı-aq ýly hımıkattardy qoldaný jolymen joıý sharalaryn turaqty negizde júzege asyrýda. Sonymen qatar óńirdiń bas polıseıi esirtki bıznesine qarsy kúres – aldyn alý, aqparattyq alańǵa monıtorıng júrgizý, graffıtı-jazbalardy joıý sekildi taǵy birneshe baǵytta júrgiziletinin atap ótti.
