Soltústik Qazaqstan oblysy Beskól aýylynda 3-4 kún ishinde 100-den astam turǵyn dáriger kómegine júgingen. Barlyǵynda aýrý belgileri birdeı.
«Balalardyń nemen aýyryp jatqanyn bilmeımin. Úıde qyzym ekeýimiz qalǵan edik, endi qyzym da aýyryp qaldy. Jaǵdaıy nasharlasa jedel járdem qyzmetin shaqyramyn», deıdi Beskól turǵyny.
Sanıtarııalyq-epıdemııalyq baqylaý basqarmasynyń mamandary aýyz sýdyń synamasyn aldy. Alaıda ázirge nátıjesi daıyn emes.
«28 mamyrdan aýdandyq aýrýhanaǵa qusý, dıareıa, dene qyzýynyń kóterilýine shaǵymdanǵan adamdar kóbeıdi. Dárigerler 78 bala men 36 eresek adamdy qabyldady. Olarǵa enterovırýstyq ınfeksııa dıagnozy qoıyldy. 10 naýqas aýrýhanaǵa jatqyzyldy. Aýdanda shuǵyl túrde provızorlyq oryndar ashyldy», deıdi Qyzyljar aýdandyq aýrýhana bas dárigeriniń mindetin atqarýshy Janar Kákimova.
Beskól aýylynda turǵyndardyń jappaı aýyrýyna qatysty oblystyq prokýratýra qylmystyq is qozǵady. Osy derekke qatysty arnaıy jumys toby qurylyp, istiń mán-jaıy anyqtalyp jatyr.
