2019 jyldyń tamyzynda 64 adam Dılfýza Aldabergenovaǵa qarsy 185 mıllıon 802 myń 400 teńgeni quraıtyn materıaldyq zalal keltirilgendigi týraly ujymdyq málimdeme jasaǵan. Bul fakt Bostandyq aýdandyq PB-nyń sotqa deıingi tergep-tekserýdiń biryńǵaı tiziliminde QR QK-niń 190-baby 3-bóligi 1,4-tarmaqtary boıynsha tirkelgen.
«Sotqa deıingi tergeý barysynda anyqtalǵany, 2018 jyldyń maýsym aıynan bastap, 2019 jyldyń qyrkúıek aıyna deıin azamatsha Aldabergenova áleýmettik jeliler arqyly ınvestısııalyq jobanyń ashylatyndyǵyn jarııalady. Jobanyń máni býkmekerlik keńselerge, sondaı-aq ártúrli bıznes-jobalarǵa aqsha salý arqyly qarajatty kóbeıtý boldy. Osylaısha, salymshylar 30% jáne 50% paıda tabý úshin banktik kartalar arqyly uıymdastyrýshyǵa jáne basqa adamdarǵa qarajat aýdarǵan. Biraq keıinnen eshqandaı paıda tappaǵan. Al azamatsha Aldabergenova salynǵan qarajatty turǵyndarǵa qaıtarmaǵan. Tergeý barysynda kúdikti ustalyp, sot sheshimimen qamaýǵa alyndy», dedi Almaty qalalyq Polısııa departamenti bastyǵynyń orynbasary Rústem Ábdrahmanov.
Tergeý Dılfýza Aldabergenovanyń kinásin dáleldedi. Qylmystyq is boıynsha is júrgizý kýálandyrylyp, olardyń materıaldary sotqa jiberildi. Almaly aýdandyq sotynyń sýdıasy D.Aldabergenovaǵa qatysty QR QK-niń 190-baby 4-bóligi 2-tarmaǵy jáne QR QK-niń 217-baby 3-bóligi 2-tarmaǵy boıynsha alty jyl segiz aı merzimge bas bostandyǵynan aıyrý týraly úkim shyǵardy.
