Memlekettik saılaý komıssııasynyń málimeti boıynsha, Hýrelsýh 68 paıyz daýysqa ıe bolǵan. Daýys berýge qatysqan 1 075 000 saılaýshynyń 820 myńnan astamy Ýhnaagıın Hýrelsýhqa daýys bergen.
Bıylǵy jyldyń basyndaǵy narazylyqtardan keıin premer-mınıstrlikten ketýge májbúr bolǵan Hýrlesýh oppozısııalyq Demokratııalyq partııanyń kandıdaty Sodnomzýndýın Erdene men «Oń adam - elektorat» koalısııasynyń múshesi Dangaasýrengıın Enhbatomdy basyp ozdy. Bul jaıynda eldiń Bas saılaý komıssııasy habarlaǵan.
Mońǵolııanyń burynǵy premer-mınıstri Ýhnaagıın Hýrelsýh demokratııalyq jolmen saılanǵan altynshy prezıdent bolmaq. Ári basqarýshy Mońǵolııa Halyqtyq partııasynyń pozısııasyn odan ári nyǵaıtady degen boljam bar.
Ol prezıdenttiń qyzmet etý merzimin birneshe merzimge shekteıtin konstıtýsııalyq ózgeristerden keıin qaıta saılaý múmkindiginen aıyrylǵan Haltmaagıın Battýlganyń ornyna keledi.
Ýhnaagıın Hýrelsýh 1968 jyly Ýlan-Batorda dúnıege kelgen. Mońǵolııa áskerı ýnıversıtetin (qazirgi el astanasyndaǵy Mońǵolııa qorǵanys ýnıversıteti) 1989 jyly saıası bilim berý mamandyǵy boıynsha bitirgen.
Ol Memlekettik basqarý jáne kóshbasshylyq ınstıtýtynda jáne Mońǵolııa Ulttyq ýnıversıtetinde memlekettik basqarý boıynsha bilim alyp shyqqan.
2017 jyldyń 21 qarashasynan bastap Mońǵolııa Halyqtyq partııasy (MNP) Ortalyq Komıtetiniń tóraǵasy boldy. 2017 jylǵy qazannan bastap 2021 jylǵy 21 qańtarǵa deıin Monǵolııanyń premer-mınıstri qyzmetterin atqarǵan.
Buryn ol sondaı-aq tótenshe jaǵdaılar mınıstri (2004 jyldan 2006 jylǵa deıin), ınspeksııa mınıstri (2006 jyldan 2008 jylǵa deıin), Mońǵolııa premer-mınıstriniń orynbasary (2014-2015 jáne 2016-2017 jyldary) sekildi laýazymdarda bolǵan.
Hýrelsýh 2021 jyly 21 qańtarda COVID-19 juqtyrǵan jáne jańa bosanǵan anany qystyq kıimsiz tasymaldaýǵa baılanysty bastalǵan narazylyqtardan keıin premer-mınıstr qyzmetinen ketetindigin málimdegen edi.
Baqylaýshylar onyń otstavkaǵa ketýiniń naqty sebebin «prezıdent bolýǵa degen umtylys» dep baǵalady.
Hýrelsýhtyń saılaý naýqanyndaǵy urany: «Mońǵolııa - óz baılyǵynyń qojaıyny».
Qoldaýshylar arasynda ol «polkovnık Hýrelsýh», al synshylar arasynda «Pýtınge eliktegish» retinde tanymal tulǵa ekenin aıta keteıik.
