Ol óziniń atyn ataýdan bas tartty. Belgili bir ortada ózin jaqsy biletindigin jáne qoǵamdaǵy qate túsinikter men alalaýshylyqtar taralyp jatqanyn eskere otyryp, ol mundaı tanymaldylyqqa ıe bolǵysy kelmeıtinin jetkizdi.
«Chıpti teri astyna salý týraly oı maǵan eki jyl buryn keldi. Ony ózimmen uzaq ýaqyt alyp júrdim, aqpanda ǵana deneme engizý týraly sheshim qabyldadym. Birinshiden, bul yńǵaıly ári zamanaýı. Biz sandyq tehnologııalardy óte jıi qoldanamyz. Qaltamyzda úı, keńse esikteri men lıftilerdiń kilt-kartalary tolyp júredi. Al chıp osyndaı qarapaıym bolsa da qolaısyz máselelerdi jeńildetip beredi. Ekinshiden, bıohakıng - álemdegi tanymal qozǵalys. Deneńizde chıp bolǵandyqtan, bank kartalary sııaqty zattardy alyp júrýdiń qajeti joq. Demek sizden urlanatyn zattar birshama azaıady» deıdi ol.
Er adam ımplantasııalanǵan chıptiń uzyndyǵy 14 mıllımetr, táýelsiz jady men kishkentaı antennasy bar qurylǵy ekenin aıtty. Implantasııaǵa arnalǵan chıpi, shprısi, zararsyzdandyrylǵan quraldary men materıaldary bar jınaqqa onyń 89 dollar aqshasy jumsalǵan.
«Mendegi chıp derekterdi berýdiń eki standartyn qoldaıdy - NFC jáne RFID. Men ony arnaıy saıtqa tapsyrys berý arqyly istettim», deıdi ol.
Jas jigit aldymen jeke klınıkanyń hırýrgyna júgingenin, ol dinı sebepterge baılanysty odan bas tartqanyn aıtty. Nátıjesinde ol pırsıng salonyna barýǵa májbúr bolǵan. Sonymen birge, onyń aıtýynsha, chıpterdi ózdiginen ımplantasııalaıtyndar dar bar.
Chıp onyń oń qolynyń bas barmaq pen suq saýsaǵy aralyǵynda ornalasqan. Oryn kezdeısoq tańdalǵan joq. Qoldyń bul bóligi qulaǵan kezde kóp jaraqttanbaıdy. Álemdik tájirıbede bul chıptiń standartty orny.
