Ádebı saýaldamamyzdyń kezekti qonaǵy – jazýshy-dramatýrg Madına Omar. Dástúrli suraq: ne jazyp júrsiz?
– Jazýdy kásip etken adamǵa jazatyn nárse óte kóp. Qarap tursańyz, qazirgi qoǵam, zaman barlyq múmkindikti berip otyr. Ásirese qazirgi zaman – jazýshy úshin taptyrmaıtyn ken tárizdi. Qazyp ta áýre bolmaısyń, barlyǵy (qazyna-baılyq) jerdiń betine shyǵyp, shashylyp jatyr. Keńes kezindegi aqyn-jazýshylardan bizdiń artyqshylyǵymyz osy. Adam balasy da san qıly, qıturqy bolmysyn jasyryp-jaýyp áýre bolmaıdy. Kerisinshe, «men mynadaımyn, maǵan qarashy» degendeı birinen-biri asyryp, neshe túrli qylyqtar men minezderin jarııa etip, jantalasady. Kez kelgen áleýmettik jelidegi paraqshany nemese pikirlerdi al da portret jasaı ber. Adamdar osylaı betperdelerin sypyryp, arsyzdanǵan saıyn jazýshy qaýym qutyrynatúsedi (shyǵarmashylyq turǵysynan) degen oıdamyn. Degenmen bul ózgeristerge ne sebep? Aqyl-oı kemistigi epıdemııasy ma álde esepsiz erkindik, Qudaıdy umytý adamzatty mas qyla ma?
Bir ókinishtisi, bizde jaqsy shyǵarmalar keńinen nasıhattalyp, kózi qaraqty oqyrmanǵa jetip jatqan joq. Ádebı kitap – adam janynyń tárbıeshisi bolsa, qazirgi tańda oqyrman (halyq) men sol aqyldy, meıirimdi tárbıeshi birin-biri kórmeıdi, bir-birimen kezdespeıdi.
Kórkemdik súzgi, redaksııalyq alqa degen uǵym múlde joǵaldy. Ol, bir jaǵynan, jazamyn, jazǵanymdy kitap etip basyp shyǵaramyn degen adamǵa barlyq múmkindikti beretin bolsa, ekinshi jaǵynan, oqyrman jaqsy men jamandy, kórkem týyndy men shalajansar grafomandyq túsiniktiń arajigin ajyrata almaı qaldy. Kimniń jarnamasy, menedjmenti myqty – sol top bastaıtyndaı, sondaı bir úrdis paıda boldy.
Bizge shuǵyl túrde ádebıettanýshylardan turatyn bedeldi bir vedomstvo, ınstıtýt kerek. Ol quramǵa aqyn-jazýshylar sııaqty shyǵarmashylyq adamdary enbeýi tıis. Sebebi óner júrgen jerde báseke, daý-damaı, adamdyq qarym-qatynas júretini zańdy. Ol top – salqynqandy, kásibı adamdardan, tek qana ǵalymdardan turýy tıis. Jáne bul aýqymdy, úlken qurylym bolýy kerek. Sebebi naryqqa shyǵyp, oqyrmandarǵa usynylyp jatqan kitapta esep joq. Solardy júıelep, esepterin, qorytyndylaryn maqala túrinde turaqty jarııalap otyratyn (áleýmettik jeliler, gazet-jýrnaldar arqyly, jınaqtar túrinde), ózge tilderge aýdarý úshin irikteýler jasaıtyn (dál qazirgi, búgingi ádebıetke) memlekettik ınstıtýt kerek... Osy máseleni kóterip dabyl qaǵatyn sát týdy.
Eger jalpydan jalqyǵa ótip, «óziń ne tyndyryp júrsiń» degen saýalǵa aýatyn bolsaq, men toǵyz jyldyń júzi boldy, M.Áýezov atyndaǵy Qazaq memlekettik drama teatrynda dramatýrg bolyp qyzmet etip kele jatyrmyn. О́zindik jumys jasap, mono bolsyn, kóp keıipkerli bolsyn, óz spektaklinde bas rólde oınaǵysy keletin akterlerdiń ıdeıalaryn júzege asyrý úshin pesalar izdeımiz, avtorlarǵa tapsyrys beremiz, keıde (tipti kóp jaǵdaıda) ózimiz jazyp beremiz, ınssenırovkalar jasaımyz. Osy teatrdaǵy toǵyz jyldyq eńbek ótilimde jıyrmaǵa jýyq pesa jazyppyn. Qazir ǵana aktrısa G.Shyńǵysovanyń tapsyrysymen «Úzilgen án» atty mıýzıkldy jazyp bola salyp, akter J.Sadyrbaevtyń monospektaklge tapsyrysyn qabyldap aldym. Osyndaı úzdiksiz shyǵarmashylyq prosess júrip jatyr...
– Shyǵarmashylyq oı-syryńyzben bóliskenińizge rahmet.
