Elorda tórinde chempıondyq ataqtan basty úmitker qos komanda – «Astana» men «Tobyl» ózara kúsh synasty. Alma-kezek shabýylmen ótken báseke barysynda qonaqtar esep ashty. 29-mınýtta Nemanıa Nıkolıch qostanaılyqtardy alǵa shyǵardy. Biraq olar bul basymdyqty ustap tura almady. Arada 15 mınýt ótkennen soń alań ıeleri penaltıden esepti teńestirdi – 1:1. Bul goldyń avtory – Marın Tomasov. Sodan keıin esep ózgergen joq. «Taraz» ben «Qaırat» arasyndaǵy matchta almatylyqtar jeńiske jetti – 0:2. Qonaqtar qatarynda mergendik tanytqandar – Vagner Lav (11-mınýt) pen Artýr Shýshenachev (67-mınýt). Al «Qaısar» men «Atyraý» arasyndaǵy matchta esep ashylǵan joq – 0:0.
Jarys kestesinde «Astana» áli de jeke-dara kósh bastap tur. Elordalyq fýtbolshylar 35 upaı oljalap úlgerdi. Olardy «Tobyl» ókshelep keledi. Qostanaılyq klýbtyń qorjynynda 32 upaı bar. 27 upaı jıǵan «Qaırat» úshinshi oryndy ıelenýde.
