Al Oral qalasyndaǵy mamandandyrylǵan Halyqqa qyzmet kórsetý ortalyǵyna bıyl jyl basynan beri 50 myńǵa jýyq batysqazaqstandyq turǵyn júgingen. Alǵash ret júrgizýshi kýáligin alýǵa 10 myńdaı adam ótinish tapsyrsa, onyń 1400-i emtıhannan súrinbeı ótip, óz qujatyn alǵan.
Ashylǵanyna birneshe jyl bolǵan mamandandyrylǵan HQO-da avtokólikke qatysty barlyq qujat jasalady. Munda júrgizýshi kýáligin alǵash rásimdeýshiler emtıhan synaǵynan óte alady. Teorııalyq jáne praktıkalyq emtıhan tapsyrýshy úmitker emtıhannan sátsiz ótken jaǵdaıda, taǵy eki múmkindigin synaı alady. Bul – júrgizýshilikke óz betimen daıyndalǵandarǵa arnalǵan talap. Al avtomektep bitirgeni týraly kýáligi bar úmitkerler úshin mundaı múmkindik sany shekteýsiz.
«Bizge avtoqyzmetterdi rásimdeý úshin oraldyqtar ǵana emes, jaqyn jerdegi aýdandar men qala turǵyndary da keledi. Avtokólikti satý-satyp alý kezinde alýshy men satýshy qatar keletinin eskersek, bólimge kelýshiler sany eki esege artady. Bizdiń mamandar ortalyqta kúnine shamamen 400-500 qyzmet kórsetedi. Odan bólek 1 myńǵa jýyq adam kelip keńes alady», deıdi «Azamattarǵa arnalǵan úkimettiń» BQO boıynsha fılıaly dırektory Nadır Qurymbaev.
Aıta keteıik, ortalyqta teorııalyq jáne praktıkalyq emtıhan tapsyrý júıesi tolyqtaı avtomattandyrylǵan. Jol júrý erejeleri boıynsha emtıhanda úmitkerge 40 suraq beriledi, ótý úshin 32 ball jınalsa jetkilikti. Praktıkalyq emtıhan jol qozǵalysyn tirkep otyratyn arnaıy jabdyǵy bar avtokólikte tapsyrylady.
«Júrgizýshi kýáligin alý ońaı emes. Mysaly bizge kúnine 100 adam emtıhan tapsyrýǵa kelse, sonyń 20-25 paıyzy ǵana tıisti upaı jınaıdy. Al praktıkalyq emtıhannan shamamen 15 paıyzy ǵana ótedi. Bıylǵy 25 qańtardan bastap emtıhan tapsyrýshylar synaq kezinde avtokólikti búldirse, keltirgen shyǵyndy óteıtindigi jóninde mindettemege qol qoıatyn boldy. О́ıtkeni tájirıbesiz júrgizýshilerdiń arasynda sasqalaqtap, bordıýrǵa shyǵyp ketetinderi jıi kezdesedi», deıdi mamandandyrylǵan halyqqa qyzmet kórsetý ortalyǵynyń basshysy Lýıza Qusaıynova.
