Zertteý nátıjelerine sáıkes qazaqstandyqtar qaıyrymdylyqqa óte belsendi jáne azamattardyń kópshiligi (54,4%) qaıyrymdylyqqa oń kózqaraspen qaraıdy, muqtaj adamdarǵa kómektesýge tyrysady.
QQDI analıtıkalyq baıandamasynda qazaqstandyqtardyń basym bóligi (46,9%) qaıyrymdylyqty kómektiń kez kelgen óteýsiz túri retinde túsinetini atap ótilgen. Áleýmettik zertteý nátıjelerin taldaý barysynda qazaqstandyqtar arasynda qaıyrymdylyqtyń basym túrleriniń top-3 reıtıngi qalyptasty. Reıtıngti jetim balalar, sonymen qatar aýyr naýqas balalar men múgedek balalar basqarady (44,1%).
Qaıyrymdylyq jasaýshylar aqshalaı qarajatty tikeleı muqtaj adamdarǵa berý arqyly qaıyrymdylyq jasaýdy jón kóredi. 2021 jyldyń qorytyndysy boıynsha mundaı azamattar 35,2%-y quraıdy. Kópshilik, atap aıtqanda 45,9%, ár adam óziniń múmkindigine qaraı qaıyrymdylyqpen aınalysýy kerek ekenine senimdi. Sonymen qatar, saýalnamaǵa qatysqan qazaqstandyqtardyń 42,3%-y tabysy qazirgiden joǵary bolǵan kezde qaıyrymdylyqqa kóbirek jumsaý múmkindigin atap ótti. Azamattardyń qaıyrymdylyqpen aınalysýyna kedergi keltiretin negizgi sebep - qarjylyq múmkindiktiń bolmaýy - 52,5%, al ótken jyly bul kórsetkish reıtıngtiń sońyna qaraı ornalasqan.
«Eki ólshemniń nátıjeleri qaıyrymdylyqpen aınalysý halyqtyń qarjylyq jaǵdaıy men ómir súrý sapasyna tikeleı baılanysty ekenin kórsetedi. Basqasha aıtqanda, adam ózi qarjylyq jaǵynan erkin bolǵan kezde muqtaj adamdarǵa kómek kórsetýge daıyn», - delingen «Rýhanı jańǵyrý» Qazaqstandyq qoǵamdyq damý ınstıtýtynyń taldaý baıandamasynda.
Áleýmettik saýalnama nátıjeleri boıynsha respondentter muqtaj adamdarǵa negizinen zattardy, azyq-túlikti, taýarlardy berýge qatysqan (37,8%). Zattar men azyq-túlik berý aqshalaı qaıyrymdylyqqa (27,4%) qaraǵanda kóbirek oryn alady.
Taldamalyq baıandamada qazirgi ýaqytta Qazaqstanda halyq úshin iri ónerkásiptik kásiporyndar, orta jáne shaǵyn bıznes, úkimettik emes uıymdar jáne ózge de qoǵamdyq birlestikter emes, memleket (60%) áleýmettik qoldaýdyń negizgi kózi bolyp tabylatyny atap ótildi.
Búgingi tańda memleket pen qoǵam bıznesten áleýmettik belsendilikti kútýde. Saýalnama derekteri boıynsha respondentterdiń 59,9%-y qazaqstandyq kompanııalar ózderi jumys isteıtin jergilikti qoǵamdastyqtarǵa qoldaý kórsetýi tıis dep sanaıdy. Respondentterdiń kópshiliginiń pikiri boıynsha (59,9%) kásipkerler paıdanyń belgili bir bóligin qaıyrymdylyqqa berýi kerek. Sondaı-aq, respondentterdiń kópshiligi úshin (72,3%) «korporatıvtik qaıyrymdylyq» uǵymy tanys emes ekenin atap ótken jón. Sonymen qatar, 47,2% qaıyrymdylyq uıymdaryna senim bildirdi.
Áleýmettik zertteý nátıjelerine sáıkes, «2021 jyly saýalnamaǵa qatysýshylardyń kópshiligi halyqtyń qorǵalmaǵan toptaryna kómek kórsetýdi jón kóredi – 49,2%. Qaıyrymdylyqtyń eń qalaýly túri «Tikeleı aqshalaı nemese múliktik kómek» boldy - 49,6%. Zertteý nátıjelerin taldaý barysynda respondentter qaıyrymdylyqtyń osy túrine senetinin jáne qatysatynyn habarlady», dep QQDI óziniń baıandamasyn qorytyndylaıdy.
Júrgizilgen zertteý qorytyndysy boıynsha memlekettik organdarǵa qaıyrymdylyqty ınstıtýttandyrý jáne osy sektordyń turaqty ınfraqurylymyn qurý jóninde usynymdar berildi.
