Salıhıtdın aǵamyzdyń bul eńbeginen Ábilhan Qasteev, Oral Tańsyqbaev, Moldahmet Kenbaev, Qanapııa Teljanov sekildi beıneleý ónerindegi alyptardyń shyǵarmalaryndaǵy shynaıylyqty baıqaısyz. Endi osy kartınaǵa úńilip kóreıikshi. Qazaqtyń saıyn dalasy, arǵy jaǵynan túıeniń órkeshi sekildi taý jotalary kórinedi, eteginde shurqyrap jaıylyp júrgen jylqylar. Bir shoqynyń ústinde otyrǵan er tulǵaly jigittiń qolynda qamshy, oǵan janasyp turǵan jazyq mańdaı boıjetkenniń júzinen tazalyq pen izgiliktiń lebi esedi. Qysqasy, jaımashýaq ómirdiń bir sáti aq kenepke tańǵy shyqtaı móldirep túse qalǵan.
Belgili qalamger Qalı Sársenbaıdyń «Men óz deńgeıimdi jaqsy bilemin» degen sýretshi jaıyndaǵy maqalasynda Qazaqstan Sýretshiler men Jýrnalıster odaǵynyń múshesi Salamat О́temisuly talantty tulǵa týraly: «1968 jyly onyń ózinen buryn «Baqyt» degen týyndysymen respýblıkalyq kórmede tanysyp, úlken áser aldym.
Sol jyldary Almaty kórkemsýret ýchılıshesinde kóbine maıly boıaý men syrshyraı jazatyn dekoratıvtik jáne pedagogtik bólimderde sabaq berdi. Ol ónerde izdenýdi unatatyn, sol túrli tájirıbe jasaý tásilin bolashaq sýretshilerge darytýǵa tyrysty. Salıhıtdın ásershildik – assasıatıvtik baǵytty ustady. «Beıneleý ónerinde tym uıań bolmańdar, batyl – tenteksoqtaý (jaqsy maǵynasynda), izdengish bolyńdar», deıtin. Aınytpaı salýǵa tyrysyp, beınelep otyrǵan dúnıeniń usaq-túıegin kóshirip otyrǵan shákirtine talaı oryndy úgit aıtyp otyrǵanyn kórgenmin. Onyń ózindik ereksheligi – qylqalammen tartýly kenep betin daýylpaz urǵan kisideı zirkildetip uryp salatyn. О́zi salyp turǵan jerden shym-shytyryqtaý kóringenmen, sál sheginip qaraǵanda bári ornynda turady. Árıne, bul kúrdeli tásildi tek has sheberler ǵana ıgere alsa kerek», dep aıtypty.
Kórnekti qylqalam sheberiniń árbir týyndysynda tarıhı tanym men zaman tynysyn sheber úılestirgen kórkemdik aıryqsha kórinedi. О́nertanýshylar onyń zattyń nemese qubylystyń ishki mánine tereń boılap, sonyń anyq kórinýin talap etetin tujyrymdy ustanǵandyǵyn aıtady.
Máselen, sýretshiniń «Qonaq keldi» (1969) degen eńbegi qazaqtyń beıneleý ónerine sony sıpat ákelgen. Sondaı-aq ónertanýshylar onyń «Tereze aldyndaǵy qyz» (1968) − ımpressıonıstik shabytpen salynsa, «Aıgúl» (1968) kartınasyn oıly dúnıe dep baǵalady.
Ásirese Aıtbaevtyń shyǵarmashylyǵynda portret janry erekshe oryn alady. Ol osy týyndylarynda tulǵalardyń basqalar baıqamaǵan qyry men syryn ózgeshe óre bilgen. Aıtalyq, ony «Á.Álimjanov», «Ana», «Áke», «Abaı», «M.Áýezov», «Sáýletshi Súleımenovtiń portreti» sekildi eńbekterinen kórýge bolady.
Jalpy, Salıhıtdın Aıtbaev – ulttyq beıneleý ónerinde bolmysy bólek ózgeshe talant. Onyń P.Pıkasso men A.Matıss týyndylarynyń túpnusqasymen tanysýy sýretshiniń shyǵarmashylyǵyna aıtarlyqtaı yqpal etken. Sodan ba, onyń kartınalaryndaǵy boıaýdyń qanyqtyǵy men kompozısııa qurylymy eshkimge uqsamaıdy. Muny siz «Kitaptar» (1964) natıýrmorty, «Baqyt» (1966), «Jas qazaqtar» (1967), «Brıgada jınalysy», «Dala qosyndaǵy túski as» (1972), «Sýretshi sheberhanasynda» (1977-1978), «Shopannyń otbasy» (1977), «Qumyralar men músin» (1988), «Ana» (1982-1983) sekildi sýretshiniń negizgi shyǵarmalarynan kóresiz. Daryndy tulǵa kitap bezendirý isine de aralasyp, osy salanyń damýyna úles qosty. Kóptegen eńbegi oqýlyqtar men kitaptarǵa endi. 1966 jyly «Meniń Otanym» atty sýretter toptamasy úshin Qazaqstan komsomolynyń syılyǵy berildi.
Aıtpaqshy, sýretshiniń jaqyn týysy – úsh júzdiń basyn qosqan Abylaı hannyń sýretin salyp, ony 1943 jyly «Mıllaı Túrkistan» gazetinde jarııalaǵan Májıt Aıtbaev.
Bul kisi 1939 jyly áskerge alynyp, batys shekarada azamattyq boryshyn ótep júrgende soǵys bastalyp, 1941 jyly tutqynǵa túsedi. Sondaǵy Túrkistan ulttyq birlik komıtetine múshe bolyp, «Jańa Túrkistan», «Mıllaı Túrkistan» gazetterin shyǵarýǵa atsalysady. Asyl tekti babamyzdyń erlik jolyn zerdelegen «Han Abylaı» atty súıekti poema jazdy.
Bul shyǵarma 1943 jyly Berlınde jınaq bolyp, jaryq kórgen. Shyǵarmalaryn «Qobyzshy Qorqyt» degen búrkenshik esimmen jarııalaǵan ardaqty azamat 1945 jyly Drezdende bomba jaryqshaǵynan qaıtys boldy. Al Abylaı han sýretiniń kóshirmesi 1963 jyly Nıý-Iorkten Almatyǵa retin taýyp jetkizilip, 1972 jyly ol alǵash ret Qazaq ensıklopedııasynyń 1-tomynda jarııalandy. Sonymen qatar 1993 jyly shyqqan tól teńgemizdiń júzdik kýpıýrasyna belgilendi.
Ulttyq beıneleý óneriniń asyl qazynasyn súbeli shyǵarmalarymen baıytqan Salıhıtdın aǵamyz ómirden erte ótse de, óshpes máńgilik izin qaldyra bildi. Búginde sańlaq sýretshiniń keskindemelik jáne grafıktik týyndylary elimizdegi memlekettik óner mýzeılerinde saqtalyp tur.
