Teatr dırektory, onyń orynbasary, merdiger uıymdar men tehnıkalyq qadaǵalaý ókilderi teatrdy jóndeýge bólingen qarjyny jymqyrdy dep aıyptaldy.
Teatr dırektory Qasenovke óziniń orynbasary Sáttibaevpen 4 epızod boıynsha aldyn ala sóz baılasý arqyly aqsha jymqyrdy jáne jymqyrýǵa oqtaldy degen aıyp taǵyldy.
Sondaı-aq sottalýshylardyń qatarynda «ADS SAPA» JShS tehnıkalyq qadaǵalaý sarapshysy Erbatyrov, «ST-Injenerıng» JShS dırektory (qalpyna keltirý boıynsha tehnıkalyq qadaǵalaý) Kenjetaev boldy, bul qylmysty «Adı-Jan» JShS dırektory Dastanov pen «Astana-Kókshe» JShS dırektory Baısalbekov uıymdastyrǵan.
Sot Qasenov, Dastanov, Erbatyrovtyń teatrdy kúrdeli jóndeýge bólingen 370,5 mıllıon teńge kólemindegi aqshany jymqyrǵanyn anyqtady.
Sondaı-aq Qasenov pen Baısalbekov jóndeý-qalpyna keltirý jumystaryna bólingen 32,5 mıllıon teńge kólemindegi aqshany urlaǵan.
«Mamandar men saraptamalardyń qorytyndysy negizinde tólem jasalǵan aktilerdiń jalǵan ekeni anyqtady. Aktilerge is júzinde oryndalmaǵan jumystar men qyzmetter engizilgen», delingen sot habarlamasynda.
Sot Sáttibaev, Dastanov, Baısalbekov pen Kenjetaevtyń jas balalarynyń bolýyn jeńildetetin mán-jaı retinde qarastyrdy.
Árbir sottalýshynyń qylmysqa qatysý róli men dárejesin, keltirilgen shyǵynnyń bir bóligin (370,5 mıllıon teńgeniń 9 mıllıonyn) ótegenin eskere otyryp, sot mynadaı jaza kesti:
- Qasenov 9 jylǵa bas bostandyǵynan aıyryldy,
- Dastanov, Baısalbekov 8 jylǵa bas bostandyǵynan aıyryldy,
- Erbatyrov 7 jyl 6 aıǵa bas bostandyǵynan aıyryldy,
- Sáttibaevtyń 2 jylǵa bas bostandyǵy shekteldi.
- Kenjetaev 3 jyl merzimge shartty túrde bas bostandyǵynan aıyryldy.
Qasenov ómir boıyna, al Sáttibaev 3 jyl merzimge memlekettik qyzmette jumys isteı almaıdy.
