Oq tıgen 20 men 24 jas aralyǵyndaǵy jigitter Sarysý aýdandyq aýrýhanasyna jetkizildi. Polısııanyń málimetinshe, aýyl jastarynyń arasynda teketires bolǵan. Kıkiljińnen keıin kúdikti bir top jigitti 16-shy kalıbrli qarýmen jaıratyp salǵan. Shamamen 30 metr jerden atylǵan bytyra 5 jigitke tıgen. Úsheýi qazir aýdandyq aýrýhanada em qabyldap jatyr. Al qalǵan ekeýi Taraz qalalyq kópbeıindi aýrýhanasyna jetkizilgen. Oq ekeýiniń de basyna tıip, bireýiniń mıyna qan quıylǵan. Qazir olar jansaqtaý bóliminde aýyr halde jatyr.
«Qazir sotqa deıingi tergeý bastaldy. Buzaqylyq nıetpen «Birneshe adamdy óltirýge oqtalý» babymen is qozǵaldy. Bul azamattardyń arasynda janjal bolǵandyǵy anyqtaldy. Sodan keıin kúdikti olarǵa qaraı oq atqan. Ol jedel izdestirilip ustaldy. Qylmysyn moıyndap, ýaqytsha ustaý ızolıatoryna qamaldy», dedi oblystyq PD krımınaldyq polısııa bastyǵy Ardaq Mádimarov.
