Al turǵyndardyń qaýipsizdigi úshin óńirdegi qyzmet kórsetý nysandary jappaı Ashyq jobasyna qosylýda. Árıne, azamattardyń densaýlyǵyna qatysty jaýapkershiligi jeke basqa qatysty bolǵanymen, indet taralýynyń aldyn alýǵa qosymshanyń da oń yqpaly tıip otyrǵan kórinedi. Máselen, birer kún ishinde Ashyq jobasy arqyly tekserýdiń nátıjesinde aımaqtaǵy 103 turǵynnyń «qyzyl» jáne «sary» mártebege ıe ekeni rastalypty. Sonyń ishinde Taldyqorǵan qalasynda 57 «sary» jáne 36 «qyzyl» mártebesin tasymaldaýshy, Panfılov aýdanynda 1 «qyzyl» jáne 3 «sary» mártebesin tasymaldaýshy, Eskeldi aýdanynda 1 «qyzyl» jáne 2 «sary», Qarasaı aýdanynda 1 «qyzyl», 1 «sary» jáne Eńbekshiqazaq aýdanynda 1 «sary» tústi mártebe kórsetken adam anyqtalǵan eken. Demek indettiń taralýyna jol bermeý úshin Ashyq jobasynyń tıimdiligi bar degen sóz.
– Búginge deıin oblystaǵy demalys basseınderi, lotereıa klýbtary jáne týrızm nysandary Ashyq jobasyna tolyq qosyldy. Iаǵnı barlyǵy 740 nysan qosymshany óz qyzmetine engizgen. Sondaı-aq «Azamattarǵa arnalǵan úkimet» memlekettik korporasııasynyń fılıaldary, Taldyqorǵan qalasynyń ákimdigi men áýejaı da qosymsha arqyly jumys isteı bastady. Sıfrly platformaǵa týrızm, mádenıet, sport jáne sanatorıı-kýrorttyq maqsattaǵy nysandar, demalys úıleri belsendi túrde qosylýda. Qazir kelýshiler men mekeme qyzmetkerlerine yńǵaıly bolý úshin Ashyq qosymshasyn ǵana emes, sonymen qatar Aitu qosymshasyn, Kaspi.kz jáne Halyk Homebank bank qosymshalaryn da qoldanýǵa bolady, – deıdi oblystyq kásipkerler palatasynyń dırektory Áset Shaıahmetov.
Aıtpaqshy, aımaqtaǵy epıdemııalyq ahýal qalypty deńgeıde bolǵanymen, indet belgisi anyqtalyp, dárigerlerdiń kómegine júgingen turǵyndar sany táýlik saıyn ósip otyr. Mysaly, ótken aptanyń sońynda vırýs juqtyrǵandardyń sany 37 adamǵa jetken. Iаǵnı bir táýlik ishinde Taldyqorǵan qalasynda 11 naýqas, Talǵar aýdanynda 7 naýqas, Qarasaı aýdanynda 5 naýqas, Ile aýdanynda 4 naýqas, Jambyl aýdanynda 3 naýqas kómekke júginse, Qaratal jáne Kóksý aýdandarynda indet juqtyrýdyń 2 jaǵdaıy Eńbekshiqazaq, Kerbulaq jáne Uıǵyr aýdandarynda bir-bir adamnan koronavırýs anyqtalypty. Sondaı-aq ótken aptada 55 adam indetten jazylyp shyqqan. Al qazir oblys aýrýhanalarynda 652 adam em qabyldap jatsa, onyń ishinde 28 naýqastyń jaǵdaıy aýyr eken. Jalpy, aımaqtaǵy juqpaly aýrýlar stasıonarlaryndaǵy oryndar sanynyń qatylýy 32,1 paıyz shamasynda bolyp otyr.
Munan bólek óńirde koronavırýsqa qarsy vaksına alý isi de qarqyndy júrýde. Búginde ekpeniń birinshi komponentin alǵandar sany 283 006 adamǵa jetken. Al tolyq egilgenderdiń tiziminde 176 566 adam tur. Derek boıynsha, oblys aýmaǵynda kún saıyn
3 364 shamasyndaǵy turǵyn indetke qarsy vaksına saldyrýǵa ótinish beredi eken.
Almaty oblysy
