«Úndi» shtamy úreıli

Nur-Sultan qalasynda koronavırýs ınfeksııasymen syrqattaný deńgeıiniń kúrt ósýine baılanysty Densaýlyq saqtaý mınıstrligi KVI juqtyrǵan naýqastardan alynǵan oń zerthanalyq úlgilerdiń PTR skrınıngin ótkizdi. Skrınıng nátıjeleri boıynsha «Delta» shtamyna («Úndi» shtamy) tán mýtasııaǵa kúdikti jaǵdaı anyqtaldy. Mýtasııanyń bolýyn jáne onyń «Delta» shtamyna jatatynyn túpkilikti rastaý DNQ úlgilerin tolyq genomdyq sekvenırleý aıaqtalǵannan keıin belgili bolady.

«Delta» koronavırýs shtamy asa kontagıoz­dy jáne anyqtalǵan shtamdarǵa qaraǵanda juqpalylyǵy 60%-ǵa joǵary. Qazirgi aına­lymdaǵy shtamdar 1 adamnan orta eseppen 3-4 adamǵa taralatyn bolsa, bul shtam 5-6 adamǵa birden juǵady jáne 7 kúnge sozylatyn qysqa ınkýbasııalyq kezeńmen sıpattalady. Sonymen qatar indetti juqtyrǵandar býyndar men ishtiń qatty aýyrsynýyn sezinedi, júrek aınyp loqsıdy, aýrý saldarynan adam sańyraý bolyp qalýy ábden múmkin jáne aıaqtardyń mıkrotrombozyna ákeledi.

Sońǵy zertteýler kór­set­kendeı, koronavırýstyń «Úndi» shtamy tósekke ta­ńylý men ólim-jitimniń jo­ǵary yqtımaldyǵyna yq­pal etýi múmkin. Osy rette Densaýlyq saqtaý mınıstrligi árbir qazaqstandyqty óz den­saýlyǵy men jaqyn­dary­nyń ómirine asa saqtyq­pen, jaýap­kershilikpen qaraý­dy suraıdy.

Infeksııadan qorǵaný men aýrý­hanaǵa jatýdan aman qalý­dyń birden-bir joly Sovid-19 vırýsyna qarsy vaksınanyń tolyq kýrsyn alý. KVI-ge qarsy ekpe alýǵa qar­sy kórsetilimderi joq ár­bir azamat qysqa merzimde vak­sınalanǵany jón.

Sondaı-aq VAK vırýs ta­ralýynyń aldyn alý maq­satynda maska taǵý, áleýmetik araqashyqtyqty saqtaý, qol gıgıenasy, úı-jaılardy jel­­detý sııaqty barlyq pro­fı­laktıkalyq sharany qa­tań oryndaý qajet ekenin eskertedi.

Dúnıejúzilik densaýlyq saqtaý uıymynyń 2021 jylǵy 20 maýsymdaǵy málimetteri boıynsha SARS-CoV-2 «Delta» shtamy álemniń 174 elin­de anyqtalǵan.