Jıynda keńes sheshimderiniń oryndalý nátıjeleri boıynsha baıandamalar tyńdalyp, Qordyń bolashaq ınvestısııalyq jobalarynyń baǵyttary talqylandy.
Nursultan Nazarbaev «Samuryq-Qazyna» ulttyq ál-aýqat qory» aksıonerlik qoǵamy basqarmasynyń tóraǵasy A.Sátqalıevtiń aqparatyn tyńdaı kele, Qor jumysyna oń baǵa berdi. Dúnıejúzilik daǵdarystyń Qazaqstan ekonomıkasyna áserine qaramastan, Qor 2020 jyldy tabysty aıaqtaǵany aıtyldy.
Keńes músheleri «Samuryq-Qazyna» ulttyq kompanııasynyń satyp alý kezindegi jergilikti úlesti arttyrýǵa baǵyttalǵan tásilderine, sondaı-aq otandyq taýar óndirýshilerdi qorǵaý sharalaryna qoldaý bildirdi. Ulttyq ál-aýqat qoryn basqarý jónindegi keńestiń Tóraǵasy pandemııa jaǵdaıynda Úkimet ulttyq ekonomıkany qoldaý úshin barlyq tetikterdi belsendi ári tıimdi paıdalanyp jatqanyn atap ótti.
Sonymen qatar keńes barysynda «Qazmunaıgaz» ulttyq kompanııasy» aksıonerlik qoǵamy men «Qazaqtelekom» aksıonerlik qoǵamy basshylarynyń esebi tyńdaldy.
Jıyn qorytyndysy boıynsha Ulttyq ál-aýqat qoryn basqarý jónindegi keńestiń Tóraǵasy birqatar naqty tapsyrma berdi.
