Búginde oblys kóleminde 5 myńǵa jýyq ishki ister organdarynyń ardageri turady. Olardyń basyn bir arnaǵa biriktirip otyrǵan oblystyq ishki ister organdary men Ulttyq ulan ardagerleri keńesi tarapynan atqarylǵan sharýalar eleýli. Polısııa qyzmetkerleriniń kásibı sheberligin shyńdaý arqyly bedeli men mártebesin kóterý – keńestiń kún tártibinen túspeıtin keleli mindetiniń biri. Ásirese patrıottyq tárbıe berýde aǵa býyn ókilderimen júzdesýdiń máni zor.
Ishki ister organdary ardagerleriniń ómiri búgingi jastarǵa ónege. Halqymyzdyń rýhanı qundylyqtarynyń ishinde jasy úlkendi qurmettep, olardyń ónegeli ómirinen úlgi-ónege alý aldyńǵy orynda turady. Osy qundylyqtardy arqaý etken ardagerler keńesi óńirdegi bereke-birlikti nyqtap, uıysa jumys isteýdi ózderine tuǵyr etip keledi.
Polısııa bolý ońaı emes. О́ıtkeni tártip saqshysynyń jumysy aýyr ári jaýapkershilik júgi salmaqty. Oǵan búkil jan-dúnıeńdi, bolmysyńdy arnaýyń qajet. Otyz jyldaǵy jetistikterge osyndaı laıyqty jandardyń arqasynda jettik. Búgingi izbasarlar da sol sara soqpaqtan aýytqymaı, eldiń tynyshtyǵy úshin aıanbaı qyzmet etýi tıis.
Men eki dáýirde quqyq qorǵaý salasynda qyzmet istegen adammyn. Ol kezde de, qazir de ishki ister salasyna qoıylǵan talaptyń qatań ekenin baıqaımyn. Jalpy, bul salaǵa jumsaqtyqtyń juǵysa bermeıtini aıan. Biraq sol bir sekseninshi jyldary Máskeýge kóbirek jaltaqtaıtyn edik. Sol jaqtan pármen kútetinbiz. Qudaıǵa shúkir, qazir óz bıligimiz óz qolymyzda. Keńestik kezeńde maıor shenine jetýdiń ózi arman bolatyn. Qazir adal qyzmetimen kózge túsken qazaq jigitteri podpolkovnık, polkovnık, tipti general dárejesine deıin kóterilip jatyr. Bul árıne, jaqsy úrdis. Jigitterdiń polısııa qyzmetkeri bolýǵa yntasy, talaby arta túsedi. Biraq qazir zaman basqa, zań da soǵan saı jetilý ústinde. Zamana úderisinen bolar, búginde qylmystyń sıpaty da ózgerdi.
Qazir áldebir saraptamalyq jumystardy tipti tehnıkalyq turǵydan júrgizýge, yqtımal qaterlerdi boljap, olardy aldyn ala toıtarýǵa bolady. Eń bastysy, halyqtyń seniminen shyǵý úshin polısııa baryn salyp jumys istep jatyr. Halyq qylmysty ashýǵa, sanyn azaıtýǵa kómektesýi, kúmándi nemese kúdikti jaıttar týraly polısııaǵa habarlap otyrýy tıis. Bul polısııa men halyqtyń bir-birimen tyǵyz qarym-qatynasta bolyp, qoǵamda tártiptiń oryn alýyna alyp keledi.
Memleket basshysynyń tapsyrmasymen, servıstik modelge kóshý jáne «jurtqa jaqyn polısııa» qaǵıdatyn iske asyrý da – óte durys sheshim. Bul jumysta negizgi ról quqyq buzýshylyqtardyń aldyn alý salasyndaǵy negizgi býyn retinde ýchaskelik polısııa ınspektorlary qyzmetine beriledi. Atap aıtsaq, ýchaskelik polısııa qyzmetkeri azamattar úshin tanymal, qoljetimdi, bedeldi bolýy kerek.
Buryn bizdiń kezimizde ýchaskelik polısııa ınspektoryn quqyq buzýshylyq jasaǵandar ǵana tanıtyn. Búginde olar halyqpen jıi kezdesýler ótkizip, baıqasaq, ár aýdan óz ýchaskelik polısııa ınspektorlaryn jaqsy tanıdy. Bul da qazirgi polısııanyń halyqqa jaqyn ekenin kórsetedi. Damyǵan elderdiń tájirıbesine súıensek, polısııa halyqpen tyǵyz baılanysta jumys isteýi kerek. О́ıtkeni servıstik modelge kóshýdegi basty sýbekt – bul zańǵa baǵynatyn azamattar. Biz bul jaǵdaıda mentalıtet pen mádenıetti, zańnama men resýrstyq múmkindikterimizdi eskerýimiz qajet. Sondaı-aq «qadamdyq qoljetimdilik» prınsıpi boıynsha polısııaǵa júginý prosesin qoljetimdi etý. Bul mobıldik posttar, polısııa qyzmetkerleriniń jedeldigin arttyrý, sonymen qatar qyzmetterdi sıfrlandyrý. Eń bastysy, halyqpen tyǵyz baılanys ári áriptestik ornatý kerek. Jergilikti halyqtyń problemasyn jergilikti qaýymdastyqpen birlese otyryp sheshý qajet.
Polısııa – bul halyq, al halyq – bul polısııa. Ishki ister organdary qyzmetkerleriniń polısııa qyzmetindegi servıstik modeldi iske asyrýy normatıvtik turǵydan bekitilýi tıis. Negizgi maqsat – qajettilikterge jaýap beretin jáne qoǵammen seriktestikte jumys isteıtin kásibı polısııa qurý.
Serjan TURSYNBEKOV,
Shymkent qalasy IIO men
Ulttyq ulan Ardagerler keńesiniń tóraǵasy, otstavkadaǵy polısııa polkovnıgi
