Zań jobasy Parlament depýtattarynyń bastamasymen qoldanystaǵy zańnama men quqyq qoldaný praktıkasynyń monıtorıngi, sondaı-aq depýtattardyń sarapshylarmen, advokattarmen, zańgerlermen, sýdıalarmen jáne quqyq qorǵaý organdarynyń ókilderimen kezdesýleri kezinde túsken usynystary negizinde ázirlendi.
«Zań jobasy tájirıbedegi problemalyq máselelerdi sheshýge, olqylyqtardy joıýǵa, sot-saraptama qyzmeti salasyndaǵy quqyqtyq retteý tártibin belgileýge baǵyttalǵan. Birinshiden, sot-saraptama qyzmetinde jańa sýbekt – «memlekettik emes sot-saraptama uıymynyń» paıda bolýy. Bul jeke sot sarapshylarynyń jumysyn odan ári damytýǵa jáne ınstıtýsıonaldy nyǵaıtýǵa negiz bolady. Osy jańashyldyq jeke sot sarapshylarynyń sot-saraptama qyzmeti úshin materıaldyq-tehnıkalyq, zerthanalyq jáne ǵylymı baza qurý boıynsha bar resýrstaryn shoǵyrlandyrýǵa múmkindik beredi. Bul óz kezeginde sot saraptamasy memlekettik apparatynyń júktemesin jeńildetip, saraptama júrgizý merzimin aıtarlyqtaı qysqartady», dedi Májilis depýtaty Snejanna Imasheva.
Ekinshiden, qujatta sot sarapshylaryn attestattaý rásimin sertıfıkattaý rásimine aýystyrý eskerilgen. Sertıfıkattaý sot sarapshylarynyń kásibı, onyń ishinde halyqaralyq standarttarǵa sáıkestigin neǵurlym tıimdi baqylaýǵa múmkindik beredi. Sondaı-aq sot-saraptamalyq zertteýler júrgizý sapasynyń joǵary deńgeıin qamtamsyz etedi.
«Úshinshiden, sot-saraptama qyzmetin standarttaý rásimin engizý sot sarapshysyna zertteý barysynda valıdasııadan ótken ǵylymı negizdelgen ádistemelermen qatar, ulttyq standarttardy da qoldanýǵa múmkindik beredi. Standarttardy qoldaný óz kezeginde sot saraptamalaryn júrgizýdi júzege asyrý kezinde biryńǵaı ǵylymı-ádistemelik tásildi qalyptastyrý jáne júrgiziletin saraptamalyq zertteýler qorytyndylarynyń obektıvtigin, nátıjeliligin jáne jaramdylyǵyn arttyrý úshin negiz bolady», dedi depýtat.
S. Imashevanyń aıtýynsha, zań jobasyn ázirleýshiler Ádilet mınıstrliginiń jáne Sot sarapshylary palatasynyń keıbir quzyretterin naqtylady. Bunyń nátıjesinde sot-saraptama qyzmetteri naryǵynda básekelestikti qalyptastyrý mindeti men memlekettik baqylaý arasyndaǵy teńgerimdi qamtamasyz etýge múmkindik bolady. Sonymen birge, sot-saraptama qyzmetteriniń rettelmegen naryǵyn qurý jáne bul qyzmetti baqylaýsyz kommersııalandyrý qaýpin boldyrmaıdy.
«Zań jobasy sondaı-aq prosestik negizderdi jetildirýge jáne sot saraptamasyn taǵaıyndaý, uıymdastyrý jáne júrgizý máselelerindegi quqyqtyq olqylyqtardy joıýǵa baǵyttalǵan birqatar normalardy qamtıdy. Qujattyń ózektiligi kúmán týdyrmaıdy, óıtkeni ol birinshi kezekte dáleldemelik bazany qamtamasyz etý máselelerin qozǵaıdy.
Osyǵan baılanysty zań jobasynda usynylǵan erejeler sot tóreligi prosesine qatysatyn azamattar men zańdy tulǵalardyń quqyqtaryn qorǵaý úshin qolaıly jaǵdaılar jasaıdy dep sanaımyz», dedi ol.
