Oblystyq polısııa departamenti baspasóz qyzmetiniń málimetinshe, 2018 jyly 34 ýchaskelik polısııa beketteriniń jańa ǵımaratyn salý jóninde oblystyq ákimdikke usynys berilgen eken. Sodan beri 28 ýchaskelik polısııa beketi paıdalanýǵa berildi. Endi taǵy da osyndaı bes beketti ashý josparlanypty. Al, jańa ýchaskelik polısııa beketteri Isataı aýdanyndaǵy H.Erǵalıev jáne Tushyqudyq aýylynda ashylyp otyr.
«Memleket basshysynyń Joldaýynda ishki ister organdary júıesin reformalaýda basty ról ýchaskelik polıseılerge júktelip, olardyń qyzmetine erekshe kóńil bólinetini aıtylǵan edi. Soǵan baılanysty jańa bekette ýchaskelik polısııa ınspektory men onyń otbasyna qolaıly turǵyn-jaı qarastyryldy. Mundaı beket tártip saqshysynyń jergilikti turǵyndardyń qaýipsizdigi men qoǵamnyń tynyshtyǵyn saqtaýǵa, qylmystyń aldyn alýǵa zor yqpalyn tıgizedi. О́ıtkeni, ýchaskelik ınspektor turǵyndardyń aryz-shaǵymyn osynda qabyldap, kez-kelgen máselege der kezinde den qoıady», deıdi oblystyq polısııa departamentiniń bastyǵy, polısııa polkovnıgi Qamza Úmbetqalıev.
Tushyqudyq aýylynyń ýchaskelik polısııa ınspektory Shyńǵys Ibatov ishki ister organynda 2014 jyldan beri jumys isteıdi.
«Jańa úlgidegi ýchaskelik polısııa beketinde tórt jumys bólmesi bar. Al, otbasym úshin taǵy tórt bólmeli turǵyn-jaı salynǵan. Endi jańa ǵımaratta táýlik boıy jumys isteýge bolady», deıdi ýchaskelik polısııa ınspektory Shyńǵys Ibatov.
