Oblystyq polısııa departamentiniń baspasóz qyzmetinen málim etkendeı, bıyl atyraýlyq polıseıler óz ómirine qaýip tóngenine qaramastan, adamdardy qutqarýda batyldyq pen janqııarlyq kórsetipti.
Máselen, Atyraý qalasyndaǵy Balyqshy shaǵyn aýdanynda 15 jastaǵy eki jasóspirim keshki saǵat 20:00 shamasynda Jaıyq ózeniniń muzyna túsip ketken. Olardyń kómekke shaqyrǵan daýsyn estigen polısııa kapıtany Asqar Qabdollaev jedel qutqarýǵa kirisip, sýdan alyp shyqqan. Sodan soń olardy úıine aparyp, jedel-járdem brıgadasyn shaqyrtqan. Qutqarylǵan Vladımır men Danıldiń biri – kolledj stýdenti, ekinshisi – 8-synyp oqýshysy.
Jedel járdem dárigerlerdiń aıtýynsha, sol sátte jasóspirimder salqyn sýǵa túskendikten denesi tońyp qalǵan. Olarǵa tıisti em-dom jasaldy. Qutqarylǵan Vladımırdiń aǵasy Aleksandr Krıshnevskıı polısııa kapıtany Asqar Qabdollaevqa rızashylyǵyn bildirip, onyń bul áreketin úlken erlikke balady.
Al, 16 naýryzda saǵat 01:00 shamasynda Qurmanǵazy aýdanynyń Maqash aýyldyq okrýgine qarasty Alǵa aýylyndaǵy turǵyn úıdiń birinde órt tutanǵan. Jalyndy der kezinde baıqaǵan ýchaskelik polısııa ınspektorlary Talǵan Rahımov pen Birjan Mahmýdov, polısııa aǵa serjanty Baqytjan Qadyrbev janyp jatqan úıden 4 eresek adam men 3 balany syrtqa alyp shyqty. О́rt sóndirýshiler kelgenge deıin ózderiniń kásibı sheberligin tanytyp, órttiń betin qaıtardy.
Sondaı-aq 11 sáýirde saǵat 04:10 shamasynda Qulsary qalasynda kópqabatty úıdegi páterdiń biri órtengen. Oqıǵa ornyna quramynda polısııa aǵa leıtenanty A.Shahaev, polısııa kishi leıtenanty A.Toıǵulov, polısııa kapıtany J.Tólepov, polısııa aǵa leıtenanty A.Marat bar «Qaısar» túngi tosqaýyl qyzmetkerleri jedel jetken. Elektr jelisinen aqaý shyǵyp, birinshi qabattaǵy páterdiń ishin qoıý tútin basqan. Polısııa qyzmetkerleri jedel áreket etip, órt sharpyǵan, sondaı-aq, kórshiles páterlerden 14 adamdy, onyń ishinde 10 jasósipirimdi dalǵa alyp shyǵyp, qutqaryp qalǵan.
Atyraý qalalyq polısııa basqarmasynyń kámeletke tolmaǵandar isteri jónindegi ýchaskelik polısııa ınspektory, polısııa aǵa leıtenanty A.Qaıyrǵalıev 14 sáýirde saǵat 01:30 shamasynda kópqabatty úıdegi páterden jasóspirim qyzdy qutqarǵan. Polıseıge 4-qabattyń balkonynan 3-qabatqa túsýge keldi. О́ıtkeni, jasóspirim qyz jalǵyz qalǵan páter kilttenip qalǵan. Sóıtip, kiltteýli páterge kirip, oqys oqıǵanyń aldyn aldy.
«Qıyn sátte adamdardy qutqarýda batyrlyq ben erlik kórsettińizder. Bul – sizderdiń taraptaryńyzdan antqa beriktiktiń, atqaratyn qyzmetke adaldyqtyń shynaıy kórinisi», dedi departament bastyǵy, polısııa polkovnıgi Qamza Úmbetqalıev.
