1/8 fınal kezdesýleriniń shymyldyǵyn A tobynda ekinshi oryn alǵan Ýels pen V tobynda dál sondaı nátıje kórsetken Danııa quramalary ashyp berdi.
«Iohan Kroıff Arenada» (Amsterdam) ótken kezdesý Danııanyń iri jeńisimen aıaqtaldy – 0:4. Match bastala sala oıyn tizginin óz qoldaryna alǵan danııalyqtar kezdesýdiń 27-mınýtynda esepti ashty. Mıkkel Damsgardtan tamasha pas alǵan Kasper Dolberg qaqpanyń alys buryshyn dál kózdep, quramasyn alǵa shyǵardy. Danııanyń basymdyǵymen ótken alǵashqy taım 0:1 esebimen aıaqtaldy.
Úzilisten keıin de qarsylastaryna qaraǵanda belsendi bolǵan Danııa 47-mınýtta esepti eseleı tústi. Bul joly da Kasper Dolberg mergendigimen kózge tústi. Garet Beıl bastaǵan Ýels quramasy esep aıyrmasyn qysqartýǵa qansha tyrysqanymen, danııalyqtar oǵan múmkindik bermedi. Matchtyń aıaqtalýyna 2 mınýt qalǵanda Ioakım Mehle esepti 0:3-ke jetkizse, ekinshi taımǵa qosylǵan qosymsha mınýtta shabýylshy Martın Breıtýeıt Danııanyń tórtinshi golyn soǵyp, oıynnyń núktesin qoıdy.
Osylaısha, 2016 jylǵy Eýropa chempıonatynda úshinshi oryn alǵan Ýels bıylǵy birinshilikti pleı-off kezeńinde aıaqtaýǵa májbúr boldy. Al shırek fınalǵa joldama alǵan Danııa endi ¼ fınalda Nıderland nemese Chehııa quramalarynyń birimen kezdesedi.
