Sózdi semser etken arǵy Abaı men Mahambetter, bergi Alash arystary aqıqatty aıtýdan taısalmaǵan, halqynyń qamyn jep, muńyn jyr etken. Sondyqtan Alashtyń ar-namysyna aınalǵan Álıhan Bókeıhan, Mirjaqyp Dýlat, Mustafa Shoqaı, Smaǵul Sádýaqastar shoǵyry qalamyn qarý etken bekzada býyn edi. Qaımana qazaq qaýyrsyn qalam qolyna alǵan qalamgerine qarýly qaıratkerdeı jaýapkershilik júktep, úmitpen qaraıtyny sol dástúrge ıek artyp, tıek salǵandyǵynan bolsa kerek.
Odan beri keńestik solaqaı saıasattyń soıqanyn kórgen Muhtar Áýezov bastaǵan alyptar toby muqalmas qurysh qalamymen kesheginiń kegin joqtap, ebin taýyp, ótkenge ketken eseni toltyrǵan marǵasqalar edi. Qazaq jýrnalısteri qyzyl senzýranyń qaqpanyna ilikpeı, jeter jerine jetkizip jazdy. Bertingi kezeńde Sherhan Murtaza, Ábish Kekilbaev, Saǵat Áshimbaev, Nurmahan Orazbekov bastaǵan býyn da serpinimen seńdi buzyp, ult rýhyn oıatyp, azattyqtyń araıly tańy atatynyn jurtyna astarlap sezdirgen, táýelsizdik kelgende egemen eliniń irgetasyn bekemdep, kólikti kóshiniń túzelýine qyzmet etken kelisti kósemsóz sheberleri edi. Jampoz jýrnalıster táýelsizdik tusynda da ulttyq sananyń ornyǵýyna, eldik múddeniń ústem bolýyna aıanbaı ter tógip, ózindik úles qosty, qosyp ta keledi. Shyǵarmashylyqtyń oqshaý aralynda ońasha otyryp qalmaı, memlekettik qyzmetke bilek sybanyp aralasqan sóz zergerleri de az emes.
Qalyń oqyrman qashanda qalamger men jýrnalıstke aqıqattyń arashashysy, shyndyqtyń shyraqshysy dep qurmet kórsetti, bátýaly sózinen ǵıbrat túıdi. Tuǵyrly tulǵalar aqıqattyń aldaspany retinde elge syıly boldy. Tarpań minez tarlandardyń taǵdyry ultynyń rýhanı ómirimen tutasyp órilip jatty. Halyqtyń minezi daýyldaı, sózi mirdiń oǵyndaı, basqaǵa baǵynbaıtyn, jurtqa jaǵynbaıtyn Baýkeńdeı alyptardy qazir de izdeıtini sondyqtan bolsa kerek.
El arasynda sózdiń kepıeti, qalamnyń qasıeti qasha ma dep alańdaıtyn aǵa býynnyń nazy emis-emis estilip qalady. Ol – negizsiz de emes. Qazir qaıratker-qalamger, «jelimen» jarysyp jazatyn jýrnalıst bolý ońaı emes. Jahandaný zamanynyń aqparattyq aǵyny halqymyzdyń qasıet-qundylyqtaryn qunsyzdandyryp, senimine selkeý túsirip, arnaly dástúrimizdiń arqaýyn setinete bastaǵany shyndyq. Sıfrly júıe «aıshylyq alys jerlerden jyldam habar alǵyzǵanymen», keńistikti jaqyndatqanymen, janyndaǵy adamdy ózińnen oqshaýlap, alshaq etetin dúleı qubylys. Aqparattyq tehnologııanyń joıqyn tolqynymen betpe-bet qalǵan qorǵansyz jastardyń áleýmettik jeliniń ishinde vırtýaldy ómir súre bastaǵany da oılandyrmaı qoımaıdy. Qolyna smartfon ustaǵan kez kelgen jannyń talǵamy tómen, derek, dáıegi negizsiz, dabyra-dabyly joıqyn jalǵan aqparat taratyp, jurtty shatastyryp, jala jaýyp, arzan ataq jınaıtyn dańǵaza-dańǵoılyq ta údep barady. Jeli keıde jelókpeniń sózine, jeliktiń kózine kórik basady. Mundaıda qym-qýyt aqparat maıdanynda maıdan qyl sýyrǵandaı senimdi derekti jedel usyný ońaı sharýa emes. Sondyqtan jýrnalıstke qajet bilim-bilikpen birge artylar jaýapkershilik júgi de aýyrlaı tústi.
Jelbýaz sózden jalyqqan, haıp emes, baıyp kerektigin túsingen jurt senimdi derekti qajet etedi. Haıp qýatyndar túrli alyp-qashpa qaýeset taratyp, indetpen birge elge iritki salsa, halyqqa qajetti málimetti shuǵyl usyna bilgen jýrnalıster kún-tún demeı eseli eńbek etip júr. Dáriger halyqtyń tánin emdese, qalamger janyn emdeıtini, al jany jalǵan aqparattyń tutqynyna túsken qaýymǵa em qonýy ekitalaı bolatynyn pandemııa kezindegi ınfodemııa dáleldep berdi. Osy kezeńde oqyrmanǵa jýrnalısterdiń qyraǵy zertteýi men aqparattyq taldaýy, ádil syny men tereń saraptamasy, súıekti suhbaty men salıqaly sózi qoǵamdyq suranysqa árdaıym qajet ekenin ańǵartqandaı.
Memleket basshysy «Halyq únine qulaq asatyn memleket» tujyrymdamasyn iske asyryp otyrǵan kezeńde buqaralyq aqparat quraldary halyqtyń shynaıy únine aınalýy kerek. Sonda qalam ustaǵan qaýym men jampoz jýrnalıster bılik pen halyqtyń arasyna altyn arqaý bola biledi. Qalaı bolǵanda da, qaı zamanda da qalam ustaǵan qaýymnyń qubylasy shyndyq bolýy tıis. Pýblısıstıka – parasatqa negizdelýi kerek. Eldiń sózin sóılemegen, kópshiliktiń kókeıindegisin aıtpaǵan, oqyrmannyń oıyndaǵysyn tappaǵan sózden sert, qalamnan qýat ketedi. Aqıqatyn aıtpaǵan, ádiletten attaǵan jerde senimge de selkeý túsedi. Al senim bolmaǵan jerde BAQ-tyń basynan baq taıatyny belgili. Sondyqtan qundylyqtar qunsyzdanǵan qubylmaly zamanda qubylamyzdan jańylmaıyq, qalamdas...
Mereke qutty bolsyn!
