Aımaqtar • 29 Maýsym, 2021

Aqtaýda vaksına alýshylar arasynda 2 bólmeli páter utysqa tigildi

121 ret kórsetildi

Mańǵystaý oblysynyń ákimi Serikbaı Trumov óńirde vaksına alýshylardy yntalandyrý sharalary qalaı uıymdastyrylyp jatqany týraly málimet berdi, dep habarlaıdy Egemen.kz.

«Koronavıýrsqa qarsy vaksınalaý jumystary jalǵasýda. Búginde birinshi komponetpen 57 800, ekinshi komponentpen 33 350 adam egildi. Onyń ishinde densaýlyq saqtaý salasy 99 paıyzǵa, quqyq qorǵaý organdarynyń qyzmetkerleri 100 paıyzǵa vaksınalandy», dedi Serikbaı Trumov Úkimet otyrysynda.

Ákimniń sózine qaraǵanda, vaksınalaý jumystaryn odan ári kúsheıtý úshin arnaıy shtab qurylyp, basqa da sanattar boıynsha naqty jumystar júrgizilip jatyr.

«Júrgizilgen jumystardyń nátıjesinde osy aıdyń birinshi onkúndiginde birinshi komponentpen 3454 adam egilse, ekinshi onkúndikte 5128-ge deıin ósti. Sońǵy aptada 8 myńǵa jýyq adam ekpe aldy. Bilim berý júıesinde vaksına alǵan qyzmetkerlerdiń úlesi 38-den 45 paıyzǵa deıin jetkizildi. Jańa oqý jylyna deıin salanyń barlyq qyzmetkerleri ekpe jumysyn aıaqtaıdy. Sonymen birge qurylysy kompanııalarynyń qyzmetkerlerin vaksınalaý kestesi bekitildi. Halyqty vaksınalaý úshin jyljymaly brıgadalardyń jumysy jáne aýyldy jerlerde úılerdi aralaý arqyly aqparattyq túsindirý jumystary kúsheıtildi», dedi oblys basshysy.

Túsindirý jumystarynan bólek, apta saıyn túrli baǵaly zattar utysqa tigilýde. Arasynda tipti páter de bar.

«Halyqty vaksına alýǵa yntalandyrý úshin óńirde 22 maýsymnan bastap basty júlde - Aqtaý qalasyndaǵy eki bólmeli páterge utys oıyny jarııalandy. Vaksına alýshylar qarqynyn arttyrý úshin apta saıyn turmystyq tehnıka, smartfondar, tońazytqyshtar, teledıdar sııaqty baǵaly syılyqtar oınatylyp turady. Jeńimpazdar arnaıy qurylǵan saıt arqyly tikele efırde anyqtalady», dedi Mańǵystaý oblysynyń ákimi.

Sońǵy jańalyqtar

Uqsas jańalyqtar