Jýyrda Memleket basshysy Qasym-Jomart Toqaevtyń áleýmettik jelide mektepterde dombyra úıretý úıirmeleri bolýyn qoldaǵanyn ata-analar men ustazdar rızashylyqpen qabyldady. Qazirdiń ózinde Almaty qalasyndaǵy qazaq mektepteriniń bárinde derlik dombyrashylar orkestri, az degende dombyrashylar ansambli bar. Elimizdiń barlyq mektebinde solaı bolsa eken. Merekemen birge kelgen taǵy bir tabysymyz – kúndelikti baspasóz betinde kúı óneri, kúı tabıǵaty, tarıhy týraly, kúıshiler týraly, ártúrli ańyz-áńgimeler, onyń qazaq bolmysyndaǵy orny, t.b. tanymdyq mańyzy óte zor qanshama maqalalar jaryq kórdi. Osyndaı bekzat ónerdi tek bizge ǵana buıyrtqan Allaǵa rahmet. Tarıhymyzdyń qıly-qıly ıirimderinde, aqynnyń sózimen aıtsaq, «myń ólip, myń tirilip» júrgende joǵaltyp almaı, búgingi urpaqqa jetkizgen ata-babamyzǵa, uly ónerdiń qadir-qasıetin syılap, onyń bolashaq urpaǵymyzdyń rýhanı azyǵy, jan serigi bolyp, dúnıejúzilik qundylyqtar qatarynan oıyp óz ornyn alýyna jol ashqan Elbasy Nursultan Nazarbaevqa rahmet!
Ulttyq dombyra kúni óte salysymen bizdiń jigitter qazaq kúıimen Gollıvýd tórinde óner kórsetip, jeńiske jetýine qalaı qýanbaısyń! Osy Uly ónerdi basqalarǵa tanyta bilsek qoı. Basqa eldiń tájirıbesine zer salsaq artyq bolmas edi. Máselen, Avstrııanyń astanasy Vena qalasyndaǵy fılarmonııanyń orkestrine 175 jyl bolypty. Bul orkestrdiń bir keremet dástúri bar. Ár jyldyń birinshi qańtarynda «Álemdik premera» degen atpen arnaıy konsert beredi. Ony basqa elder aldyn-ala jasalǵan kelisim arqyly óz úıinde otyryp-aq kóredi. Biz Reseıdiń «Kýltýra» telearnasy arqyly kóremiz. 2010 jyly 72 elden 50 mln. adam ony tamashalaǵan. Sońǵy jyldary 90 el qabyldaıdy eken. Tipti Ekinshi dúnıejúzilik soǵys kezinde de úzbeı ótkizip otyrypty. Negizinde Shtraýstardyń (ákesi, onyń úsh uly) shyǵarmalary. Sońyna qaraı Iogann Shtraýstyń «Vena ormanynyń ertegileri», «Kógildir Dýnaı» valsteri oryndalady da, áke-Shtraýstyń marshymen aıaqtalady. Marshty búkil zal tik turyp, qol soǵyp, tyńdaıdy eken. Dástúr solaı. Konsert barysynda basqa zaldan osy shyǵarmalarǵa qoıylǵan baletten úzindi, eldiń ádemi tabıǵatyn ushaqtan túsirip kórsetip otyrady. Bul konsertti bir ret kórgen adam jyl boıy kútedi, nemese sol eldi kórýge barady eken. Osy úlgimen biz de qazaq kúıin dúnıege tanytsaq qoı. Ol úshin Almaty jáne Nur-Sultan qalalarynda kúı saltanatyn kórsete alatyn arnaıy konsert zaly bolsa. Munda jyl saıyn Ulttyq dombyra kúni arnaıy konsert uıymdastyryp, ony baýyrlas túrkitildes elderge aldyn-ala jasalǵan kelisim arqyly kórsete bastasaq, onyń aýdıtorııasy, sóz joq, jyldan-jylǵa keńı berer edi. Konsert ǵımaratynyń bir zalynda kúıshi sazgerlerdiń galereıasyn jasap, olar týraly tolyq aqparat berýge bolady. Osy ǵımaratta arnaıy kitaphana uıymdastyryp, kúı óneri men kúıshiler týraly ádebıetti jınastyrsaq. Tipti munda kúı týraly lektorıı ashyp, ónertanýshylar túsinikteme berip tursa ǵoı. Bul elge kelip jatqan qonaqtar, ásirese ózimizdiń jastar kúı qudyretin túsinýi úshin, halqynyń ulttyq qundylyǵyn baǵalaı bilýi úshin kerek-aq.
Bul usynysty oı bólisý dep qabyldańyzdar.
Shámsha BERKIMBAEVA,
Qazaqstannyń eńbek sińirgen qaıratkeri
