Bıyl elorda kúni qurmetine Mılannyń «La Skala» teatry kelip óner kórsetedi dep kútilýde
«Astana Opera» memlekettik opera jáne balet teatry aldaǵy úsh jylda atqarylatyn is-sharalardy naqtylady. Sonyń ishindegi eń bir eleýli oqıǵa – aty ańyzǵa aınalǵan «La Skala» teatrynyń Astana kúnine oraı gastroldik saparmen kelip, 30-maýsym men 4-shilde aralyǵynda elordalyq kórermenge «Don Kıhot» balet-spektaklin usynatyndyǵy. Aıtýly óner ordasy óziniń 2015-2016 jylǵa deıingi is-josparyn aldyn-ala shegelep qoıǵanyna qaramastan, Qazaqstanǵa óner saparymen kelýge barynsha nıet bildirip otyr.
Bıyl elorda kúni qurmetine Mılannyń «La Skala» teatry kelip óner kórsetedi dep kútilýde
«Astana Opera» memlekettik opera jáne balet teatry aldaǵy úsh jylda atqarylatyn is-sharalardy naqtylady. Sonyń ishindegi eń bir eleýli oqıǵa – aty ańyzǵa aınalǵan «La Skala» teatrynyń Astana kúnine oraı gastroldik saparmen kelip, 30-maýsym men 4-shilde aralyǵynda elordalyq kórermenge «Don Kıhot» balet-spektaklin usynatyndyǵy. Aıtýly óner ordasy óziniń 2015-2016 jylǵa deıingi is-josparyn aldyn-ala shegelep qoıǵanyna qaramastan, Qazaqstanǵa óner saparymen kelýge barynsha nıet bildirip otyr.
Osyǵan baılanysty «Astana Opera» teatry qazirdiń ózinde «Biletbar.kz» operatory arqyly bılet satýdyń elektrondyq júıesin iske qosyp úlgerdi. Bir aıta keterligi, kassa arqyly satyp alynatyn bılet pen ǵalamtordyń kómegimen qol jetkizetin bılettiń quny birdeı. Sońǵy joba ónersúıer qaýymnyń spektaklge kirýin yńǵaıly etýmen qatar bılettiń barlyq adamǵa qoljetimdi bolýyn qamtamasyz etedi.
«Biletbar.kz»-tiń bas dırektory Jandos Jáketovtiń málimdeýinshe, bılet satý júıesi ashyq jáne zamanaýı úlgide júzege asady. Satylǵan ár bılet júıede tirkeletindikten ony baǵdarlama arqyly óshirý, ózgertý áste múmkin emes. Sondaı-aq, bıletti qoldan jasaý sııaqty alaıaqtyq áreketterdi boldyrmaýǵa da asa mán berilip otyr. О́ıtkeni, ár bılet orny, qatary, qalaı jáne qaı ýaqytta alynǵany jaıly satyp alý deregi bar «QR kodpen» qamtylǵan. Zalǵa kirgende osy kod arnaıy quraldyń kómegimen skannan ótkiziledi de aqparat oqylady. Osylaısha bılet lezde tekserýden ótip shyǵa keledi.
Smartfon jáne planshettik quraly bar adam bıletti basyp shyǵaryp, áýre-sarsańǵa túspeıdi, sebebi, endi munan bylaı elektrondyq bılet opsııasy iske qosylyp otyr. «Astana Opera» teatrynyń marketıng departamentiniń dırektory Mansur Smaǵambetov «QR kody» barlyq bıletterge engiziletinin, onyń ishinde kassa arqyly satylatyn bıletter de bar ekenin, sonymen birge, bıletti elektrondyq jolmen satyp alý júıesi aldaǵy jyldyń qańtarynan bastap jumys isteıtinin aıtty.
Bárin aıt ta, birin aıt, atyna buryn tek syrttaı súısinip júrgen qazaqstandyqtar Italııaǵa at terletip barmaı-aq «La Skalanyń» tamasha ónerin óz jerinde ógeısimeı qyzyqtaıtyn ǵajap tartýǵa ıe bolyp otyr. Italıandyqtar ákeletin Servantestiń «Don Kıhot» spektakli bizdiń kórermen úshin asa tyń dúnıe emes, astanalyq teatrlarda bul qoıylym osyǵan deıin talaı márte kórermennen óz baǵasyn alyp ta qoıǵan. Komedııa men tragedııany qatar qamtyǵan eki aktili baletti kezinde Elbasynyń ózi kelip tamashalaǵany este.
Deı turǵanmen, klassıkanyń otany sanalatyn eldiń maıtalmandary eńsergen ónerden úlgi alyp, úırener tustar az bolmasy anyq. Shalǵaıdaǵy óner shańyraǵyn munda shaqyrýdaǵy maqsat ta sol bolsa kerek. «Astana Opera» teatryn «La Skala» dárejesine jetkizý. Klassıkalyq ónerdiń shyńyna balanǵan teatrdyń kásibı jetistiginen sýsyndaý.
Aldyn-ala habarlaýǵa turatyn taǵy bir jańalyq – osy jylǵy kúzde elimizge Vena operasynyń trýppasy da gastroldik saparmen keledi dep josparlanýda. «Shtats opera» dúnıe júzindegi eń áıgili operalardyń birine jatady. «Astana Opera» teatryndaǵy tamashalar munymen shektelip qalmaıdy, olar da ózderiniń keremet jetistikterin ózgelerge pash etýge asyǵady. Mysaly, Fransııada, sonymen birge Nıý-Iorktegi «Karnegı holda» konsert berip, «Kovent-Gardende» óner kórsetedi degen maqsattar tur. Al, jas teatr ujymy jyl basyndaǵy shyǵarmashylyqty Almatyǵa gastroldik sapar jasaýmen bastamaq. Aqpannyń 4-i men 10-y aralyǵynda Abaı atyndaǵy memlekettik akademııalyq opera jáne balet teatrynda «Birjan-Sara», «Roden» spektaklderi qoıylyp, konserttik baǵdarlamalar usynylmaq. Sondaı-aq, naýryzdyń 8-i men 10-y aralyǵynda Reseıdiń Sankt-Peterbýrg qalasyndaǵy «Marııa» teatryna «Attıla», «Birjan-Sara», «Roden» týyndylarymen barýdy kózdep otyr.
Qarashash TOQSANBAI,
«Egemen Qazaqstan».
