Soltústik Qazaqstannyń 18 aýylyna aýyz sý jetti

Sonyń ishinde Esil aýdanyndaǵy qazirgi eń úlken qazaq aýyly – Taýaǵash ta qýanyshqa kenelgenderdiń biri boldy. Bul aýyldy Presnov toptyq júıesine qosý osydan 3 jyl buryn sheshilip, aýyldyń shetine aqshańqan ǵımaraty da turǵyzylǵan edi. Alaıda sý jetkizý kásipornyndaǵy keleńsizdikter, daý-damaılar jobany tolyq iske asyrylmaǵan. Burynǵy aýdan ákimi talaı ret ýáde berse de aýylǵa sý jetkizýdi sheshe almaǵan. Bul máseleni biz talaı ret jazdyq ta. Endi sol másele sheshilip, oblys ákimi Qumar Aqsaqalovtyń ózi aýylǵa baryp, sý jetkizý júıesin óz qolymen ashty. 

«Búgin Jambyl, Esil jáne Mamlıýt aýdandarynda 11 myń turǵyny bar 18 aýylǵa sý keldi. Presnov toptyq sý qubyrynyń ekinshi kezeńi iske qosyldy. 8 eldi mekenge taratý jelilerin júrgizdik», dep jazdy óńir ákimi áleýmettik jelidegi paraqshasynda.

Al kelesi kezeńde - Presnov toptyq sý júıesine 15 aýyl qosylady, onda 20 myń adam turady. Joba 2 kezeńge bólingen: birinshisi boıynsha jyl sońyna deıin 7 aýyl qosylady. Ekinshi kezeńde qalǵan aýyldarǵa 2022 jyldyń aıaǵyna deıin tartylady.

Oblysty áleýmettik-ekonomıkalyq damytýdyń II Keshendi josparynyń ıgiligin aýyl turǵyndary osylaı kórip jatyr.  Bul aýyldyqtardyń kóńil-kúıin kóterip, ómir súrýge qushtarlyqtaryn arttyrary sózsiz.

Bıyl sýmen jabdyqtaýǵa bólingen soma eki esege ósip, 11,4 mlrd teńgege jetken. Bólingen qarjyǵa 49 aýyldy sýmen qamtylmaq. Bul 3 myńnan asa otbasy úılerine sý tartady degen sóz. Jyl sońyna deıin aýyl turǵyndarynyń 83,5% sapaly aýyz sýmen qamtamasyz etiledi. Keshendi jospardyń arqasynda 2025 jylǵa deıin 78 aýyl sý júıesine qosylyp, aýyl turǵyndaryn qamtamasyz etý - 100% bolady.

Soltústik Qazaqstan oblysy