Forým aıasynda halyqaralyq beıbitshilik pen qaýipsizdik máseleleri boıynsha kún tártibin ilgeriletý, sondaı-aq áıelderdiń qoǵamdyq ómirge tıimdi qatysýy men sheshim qabyldaýy taqyrybynda «Áıelder, beıbitshilik jáne qaýipsizdik» sessııasy ótti.
Is-sharaǵa Birikken Ulttar Uıymy Bas hatshysynyń arnaıy ókili, Ortalyq Azııa úshin aldyn alý dıplomatııasy jónindegi BUU óńirlik ortalyǵynyń basshysy Natalıa German, AQSh Memlekettik hatshysynyń Áıelderdiń jahandyq máseleleri jónindegi Keńsesi basshysynyń mindetin atqarýshysy Katrına Fotovat, Qazaqstannyń Jenevadaǵy BUU bólimshesi jáne basqa da halyqaralyq uıymdar janyndaǵy turaqty ókili Joǵary mártebeli Janar Aıtjanova, «AQSh–Qazaqstan áıelder alıansy» Qorynyń negizin qalaýshy» Aıanat Ksenbaı qatysty.
Sessııa barysynda spıkerler «Áıelder, beıbitshilik jáne qaýipsizdik» jahandyq kún tártibin, onyń ishinde áıelderdiń róli jáne olardyń beıbitshilik, turaqtylyq pen damýǵa baılanysty sheshimder qabyldaý prosesterine áserin talqylady.
Qazaqstan Respýblıkasy Strategııalyq josparlaý jáne reformalar agenttiginiń tóraǵasy Qaırat Kelimbetov genderlik teńdik saıasatynda úılesimdiliktiń mańyzdylyǵyn atap ótti.
«Sonymen qatar, «Áıelder, beıbitshilik jáne qaýipsizdik» kún tártibi aımaqtyq beıbitshilik pen qaýipsizdikti qamtamasyz etý de mańyzdy. COVID-19 pandemııasynan keıin áıelderdiń ádiletti ekonomıkalyq ósý men ornyqty damýdy qamtamasyz etýdegi rólin túsiný jáne áıelderge álemdik deńgeıde múmkindikter berý saıasatyn ázirleýdi jalǵastyrý qajet», dedi Qaırat Kelimbetov.
Birikken Ulttar Uıymy Bas hatshysynyń arnaıy ókili Natalıa German 2020 jylǵy jeltoqsanda qurylǵan kórnekti saıasatker áıelderiniń qatysýymen Ortalyq Azııa elderiniń kóshbasshy áıelder dıalogynyń mańyzdylyǵyn nazardan tys etpedi.
«Ortalyq Azııa elderiniń kóshbasshy áıelder dıalogy - Ortalyq Azııadaǵy áıelder kóshbasshylary arasyndaǵy yntymaqtastyqtyń erekshe úlgisi. Platforma tek «Áıelder, beıbitshilik jáne qaýipsizdik» kún tártibin alǵa jyljytýda ǵana emes, sonymen qatar jalpy aımaqtaǵy turaqtylyq pen qaýipsizdikti saqtaýda mańyzdy qural bola alady», dedi Natalıa German.
