Buǵan deıin habarlanǵandaı, kóktemgi jaýyn-shashynnyń bolmaýyna baılanysty Mańǵystaý oblysy men Qyzylorda oblysynyń Aral aýdanynda qatty qurǵaqshylyq boldy. Qalyptasqan jaǵdaıda jem-shóptiń bolmaýynan atalǵan óńirlerdiń mal sharýashylyǵy salasy zardap shekti.
Mańǵystaý oblysynyń turǵyndaryna kómek retinde respýblıkanyń basqa óńirlerinen eki apta ishinde 13 myń túp jáne 92 oram shóp ákelindi. Qosymsha, Qostanaı oblysy apta saıyn 5 vagonnan kebek jóneltýde. Aqtóbe jáne Atyraý oblystary Mańǵystaýlyq sharýalarǵa óz aýmaqtarynda shóp shabýǵa múmkindik berdi.
Shóp satyp alýdy «Kaspıı» ÁKK qarjylandyrdy (204 mln teńge).
О́z kezeginde Azyq-túlik korporasııasy 637 tonna arpany 17% - ǵa tómendetilgen baǵamen satty.
Mańǵystaý oblysynyń agroqurylymdarynda maldyń qystaýy úshin jáne jeke qosalqy sharýashylyqtardyń jem satyp alýy úshin Úkimet rezervinen 1,9 mlrd teńge bólinedi.
Onymen qosa, jaıylymdyq jaǵdaılary jazǵy jaıýdy júzege asyrýǵa múmkindik beretin Beıneý jáne Qaraqııa aýdandaryna maldy tasymaldaý júzege asyrylýda. Sondaı-aq, Aqtóbe, Atyraý jáne Soltústik Qazaqstan oblystarynyń aýmaǵyna jaz kezinde mal jaıý úshin 2260 bas jylqy, 3 myń qoı, 200 túıe jáne 1010 bas IQM tasymaldandy.
Jalpy alǵanda, Mańǵystaý oblysyndaǵy jaǵdaı turaqtandy, mal ólimi toqtady.
Qyzylorda oblysynyń Aral aýdanyna jońyshqa jetkizý uıymdastyryldy, sonymen qatar, myń tonnadan astam shóp, 40 tonna qunarly jem tústi. Azyq-túlik korporasııasy arqyly 600 tonna arpa satyp alý týraly kelisim-shart jasaldy. Sondaı-aq, jem-shópti 10-15% arzandatylǵan satý boıynsha aýyl sharýashylyǵy jármeńkesi ótkizildi. Budan basqa, jergilikti bıýdjet qarajaty esebinen azyq qunyn sýbsıdııalaýǵa 3,4 mlrd teńge kóleminde qarajat bólý týraly másele qarastyrylýda.
Qyzylorda oblysynyń Aral aýdanyndaǵy jaǵdaı da turaqtandy, mal ólimi faktileri tirkelmedi.
Aýyl sharýashylyǵy mınıstrliginiń janynan jem-shóppen qamtamasyz etý jáne jedel den qoıý máselelerin sheshýdi úılestirý úshin respýblıkalyq jedel shtab quryldy, onyń quramyna oblystar men aýdandar ákimderiniń orynbasarlary, Azyq-túlik korporasııasy men Báıterek holdıngi uıymdarynyń basshylary engizildi.
Oblys ákimdikteri aldaǵy ýaqytta aýyl sharýashylyǵy maldaryn qystaýǵa jem daıyndaý josparyn aıqyndap, apta saıyn monıtorıng júrgize otyryp, olardy oryndaý boıynsha jumystar uıymdastyrady.
