– Bul – halqymyzdyń tamyry tereńde jatqan tól ónerin dáripteıtin meıram. Qazaq pen dombyra – bir-birinen bóle-jarýǵa bolmaıtyn egiz uǵym. Dombyra – kóne zamannyń ańyzdaryna arqaý bolǵan kıeli aspap. «Aqsaq qulan» kúıiniń shyǵý tórkinin bilmeıtin qazaq kemde-kem. Ejelgi dáýirden jetken qasterli dombyra urpaqtan-urpaqqa mıras bolyp keledi. Qazaq san ǵasyrlyq shejiresiniń kýási bolǵan qasıetti aspapty boıtumaryna balaǵan. Qazirgi tilmen aıtsaq, bul – bizdiń ulttyq brendimiz, – dedi Prezıdent.
Memleket basshysynyń aıtýynsha, qudiretti qos ishektiń úninde uly dalanyń jyry, babalardyń syry saqtalǵan. Halqymyz qýanyshy men qaıǵysyn, arman-tilegi men úmitin kúı arqyly jetkizgen. Memleket basshysy dombyraǵa til bitse, tebirenbeıtin qazaq joq ekenin, qandastarymyz mekendeıtin qaı elge barsaq ta, dombyranyń qońyr úni kúmbirlep turatyndyǵyn atap ótti. Baıtaq dalany dúbirletken kúıshilerdiń asyl murasy – rýhanı qazynamyzdyń baǵa jetpes baılyǵy.
– Qurmanǵazynyń «Saryarqasy», Táttimbettiń «Sarjaılaýy» kúı óneriniń shyńy sanalady. Nurǵısanyń «Aqqýy» – qazaqtyń qanyna sińgen bekzat ónerdiń biregeı týyndysy. Sondaı daryn ıelerinen amanat bolǵan kıeli mura búginde adamzattyń asyl qazynasyna aınaldy. Kúı óneri IýNESKO sheńberindegi qundylyqtar qataryna qosyldy. Dombyrany ulyqtap, kúı ónerin damytý úshin elimizde kóptegen ıgi ister atqarylýda. Elordada kúı atasy Qurmanǵazynyń eskertkishi ashyldy. Al keshe ǵana kúıshi Dına apamyzdyń qurmetine sáýlet týyndysy boı kóterdi, – dedi Qasym-Jomart Toqaev.
Prezıdent ozyq mádenıeti bar ulttyń rýhy árdaıym bıik bolary sózsiz dep sanaıdy. Sondyqtan óskeleń urpaq osy kıeli ónerdi laıyqty jalǵastyrýy qajet. Mektepte dombyra úırenýge arnalǵan fakýltatıv sabaqtaryn engizý jónindegi bastamany qoldaǵan Qasym-Jomart Toqaev, bul sabaqtar balalarymyzdyń ulttyq sanasynyń kúsheıýine jáne olardyń kózqarasy men mádenı tanymynyń keńeıýine oń yqpal etetinine senim bildirdi.
– Bıyl birinshi mamyrdan shyǵarmashylyq úıirmeler memlekettik tapsyrys aıasynda jumys isteı bastady. Balalar mundaı úıirmelerge tegin qatysatyn boldy. Osynyń barlyǵy jastardyń ulttyq qundylyqtardy ıgerýi úshin qajet. Sondyqtan dombyranyń qadir-qasıetin óskeleń urpaqtyń sanasyna sińirý – óte mańyzdy mindet. Qazir jastarymyz dombyrany zamanaýı mýzykamen ushtastyryp, jer júzine tanytýda. Bul tól tarıhymyz ben mádenıetimizge álem halyqtarynyń qyzyǵýshylyǵyn arttyrady, Qazaqstannyń biregeı bet-beınesin qalyptastyrady, – dedi Memleket basshysy.
Sóz sońynda Qasym-Jomart Toqaev mýzyka óneri eshkimdi ult pen tilge bólmeıtinin, dombyranyń úni elimizdegi barsha etnostardy ortaq qundylyqqa biriktirip, rýhanı tutastyqqa bastaıtyndyǵyn atap ótti.
– Ultymyzdyń rýhyn kóteretin dombyraǵa ár shańyraqtyń tórinde oryn bar. Sebebi dombyra – qazaqtyń jany, – dedi Prezıdent.
