Batys Qazaqstan oblysynyń Tótenshe jaǵdaılar departamenti dabyl qaǵýda: sońǵy kúnderi óńirde kún raıy qatty ystyq bolyp, halyqtyń kópshiligi sý jaǵalap ketti. О́kinishke qaraı, adamdardyń qaýipsizdik sharalaryn eskermeýinen orny tolmas oqıǵa da kóbeıip tur. Bıylǵy shýǵa shomylý maýsymy bastalǵaly óńirde 18 adam sýǵa ketipti. Onyń 8-i – kámeletke tolmaǵan bala.
«Oqys oqıǵalardyń kóbi ruqsat etilmegen jerge sýǵa shomylý sebebinen bolyp jatyr. Qutqarýshylary joq, sý asty tolyq zerttelmegen ózen-kólderge shomylý sońy osyndaı qaıǵyly qazaǵa soqtyryp tur. Sondyqtan ruqsat etilgen jerlerde jáne arnaıy jaǵajaılarda ǵana shomylyńyzdar! Sýǵa shomylýǵa ruqsat etilmegen belgileri bar jerde sýǵa túspeńizder! Eskertýleri bar belgilerden asyp júzbeńizder! Kún kózine qatty qyzdyrynyp, birden sýǵa sekirmeńiz! Mas kúıinde shomylýǵa, qopaǵa qaraı júzýge bolmaıdy» deıdi Batys Qazaqstan oblystyq Tótenshe jaǵdaılar departamenti Tótenshe jaǵdaılardyń aldyn alý basqarmasynyń bas mamany Nuraly Mýsıev.
4 maýsym kúni bolǵan eki oqıǵadan 5 adam qaza tapqan. Onyń biri Oral qalasy aýmaǵynda, Orda kóshesiniń Jaıyq ózenine tirelgen mańynda bolǵan. О́zende shomylyp júrgen qyz bala kenetten sý astyndaǵy qazan shuńqyrǵa tap bolyp, batyp ketken. Ony qutqaram dep umtylǵan ákesi de qaza taýypty.
Al ekinshi oqıǵa Bórli aýdanyna qarasty Jarsýat aýylynda bolǵan. Bul eldimeken de Jaıyq ózeniniń jaǵasynda ornalasqan. Qaıǵyly jaǵdaıdyń dál qalaı bolǵany belgisiz, sýǵa ketken anasy men eki balasy ózen jaǵasynan tabylǵan.
«Sýǵa tek júzý bilmeıtinder, jas balalar batyp ketedi deýge bolmaıdy. Bıyl 27 mamyr kúni Terekti aýdanyndaǵy «Ýlykólde» jas jigit sýǵa ketti. Ol áskerı boryshyn teńiz flotynda ótegen, teńiz jaıaý áskeri sarbazy bolatyn. Sondyqtan «ot pen sý – tilsiz jaý» degen qazaq naqylyn eskerip, asa saq bolý kerek» deıdi oblystyq departament bastyǵynyń orynbasary podpolkovnık Arman Toqanov.
