О́ner • 08 Shilde, 2021

Gollıvýd jobasyna qatysty

64 ret kórsetildi

«Astana Opera» sımfonııalyq orkestriniń ártisteri amerıkalyq kınorejısser, ssenarıst ári prodıýser, úsh márte «Oskar» syılyǵynyń ıegeri Olıver Stoýnnyń Qazaqstannyń Tuńǵysh Prezıdenti – Elbasy Nursultan Nazarbaev týraly Qazaq – The History of Golden Man fılmine arnap mýzyka oryndady. Fılmniń rejısseri – ýkraınalyq jáne amerıkalyq kınoındýstrııa qaıratkeri Igor Lopatıonok, oǵan arnap mýzykany ataqty kompozıtor, «Altyn globýs» qurmetti marapatynyń ıegeri Karlo Sılıotto jazdy.

Mýzyka teatrdyń Sımfonııalyq orkestriniń oryndaýynda «Astana Ope­rada» jazyldy. Derekti fılm 8 se­rııadan turady. Olıver Stoýnnyń Qa­­zaqstannyń Tuńǵysh Prezıdenti Nursultan Nazarbaevtyń ómiri týraly aýqymdy suhbatynda Qazaqstan men Ortalyq Azııadaǵy saıası ahýal jáne elimizdiń mádenıeti men tarıhy jaıyn­da áserli áńgime órbıdi.

– Shyny kerek, fılmge kirispes buryn Qazaqstannyń syrtqy saıasatynan habarym bolmasa da, mol tá­jirıbe jınadym. Sebebi Nursultan Nazarbaevpen kezdesip, ol kisi jas kú­­ninde qandaı qarapaıym bolsa, qa­zir de sol qalpynda ekendigin tanydym. Qolyndaǵy bıligine qaramastan, Nursultan Ábishulynyń boıynan qara­paıym jumysshy bolǵan kezdegi adam­gershilik qasıetteri baıqalyp turdy, − dedi Karlo Sılıotto.

Sondaı-aq kompozıtor ózine rejısser men bas prodıýser mýzyka jazýǵa tolyq erkindik bergendigin aıtady.

− Osy týyndy jáne budan burynǵy «Kóshpendiler» kórkem fılmine (2007 jylǵy shilde) baılanysty Qazaqstanǵa degen kózqarasym erekshe. Buǵan deıin de men Almatyǵa kelip, Azııa festıvaline qatysyp, birqatar kompozıtorlarmen tanystym. Osy jobada Qazaqstannyń eńbek sińirgen qaıratkeri, tanymal kom­pozıtor, folklor zertteýshisi ári mýltıınstrýmentalıst Edil Qu­saıynov pen Qazaqstannyń eńbek sińirgen óner qaıratkeri, etnograf Erlan Sábıtovtyń mýzykasyn paıdalanatynymdy bildim. Biz olarmen qazaq ulttyq aspaptarynyń dybystalýyn jazdyq, − dedi ol.

Sonymen qatar maestro elimizge ózi­men birge dybys ınjeneri men Los-And­­jelesten mýzykalyq redaktorlyq tobyn ala kelipti.

− Qazaqstanǵa degen mahabbatymnan shabytynan mýzyka dúnıege kelip, «Astana Opera» sımfonııalyq orkes­trimen tamasha jumys istedik. Solıster – minsiz, orkestr – ǵajap, olardyń bári kásibı joǵary mamandar. Orkestrdiń barlyq solısterimen biz fortepıano solosyn, arfa solosyn, soqpaly aspaptar solosyn jazyp, hor jáne opera solıs­terimen birlesip eńbek ettik, − dep atap ótti suhbat sońynda Karlo Sılıotto.

Jas kompozıtor, dombyrashy Ábil­qaıyr Jarasqan da osy fılmniń saýndtregi boıynsha jumys istegen.

− Osynaý aýqymdy jobaǵa qatysý – men úshin úlken abyroı. Sebebi men oǵan kompozıtor retinde qatysqan joq­­pyn, ulttyq aspaptarda oınaıtyn mýzykanttardyń jumysyna jetekshilik ettim. Karlo ekeýimiz bir-birimizdi aıt­qyzbaı-aq túsinetin jaqsy dospyz, keıde ári qaraı ne isteý kerektigin sheshý úshin bir kózqarastyń ózi de jetkilikti. Men fılmniń «shymyldyǵyn ashatyn» mýzykany jazdym, onda qazaqtyń tabıǵaty tunyp tur. Bul kompozısııa «Ańyz» dep atalady, oǵan bul ataýdy jobanyń rejısseri ári prodıýseri, Olıver Stoýnnyń shákirti Igor Lo­pa­tıonok berdi, − deıdi ol.

Sońǵy jańalyqtar

Dollar qymbattady

Qarjy • Búgin, 10:59

Elordada áýe shary qulady

Oqıǵa • Búgin, 10:37

Qarjy mınıstriniń orynbasary taǵaıyndaldy

Taǵaıyndaý • Búgin, 10:24

EQYU Bas hatshysy Qazaqstanǵa keledi

Parlament • Búgin, 09:31

Beısenbige arnalǵan aýa raıy boljamy

Aýa raıy • Búgin, 09:00

Uqsas jańalyqtar