«Aýyl – El besigi» arnaıy jobasy boıynsha 1,1 mıllıard teńge qarastyrylǵan. Al oblys bıýdjetinen bólingen 6,5 mıllıard teńge 218 jobany júzege asyrýǵa jumsalady.
«Jarty jyl ishinde kólik ınfraqurylymyn retteýge bólingen qarajattyń 5,3 mıllıard teńgesi ıgerildi. Bul jyldyq jospar 28%-ǵa oryndaldy degen sóz. Osy jyldyń qorytyndysy boıynsha, jaqsy jáne qanaǵattanarlyq deńgeıdegi oblystyq jáne aýdandyq mańyzy bar joldardyń úlesi ótken jylǵydan asyp, 78%-ǵa jetedi. Bul kórsetkishten bizdiń óńir el boıynsha 9-shy orynda», dep túsindirdi Qostanaı oblysy ákimdiginiń jolaýshylar kóligi jáne avtomobıl joldary basqarmasynyń basshysy Oljas Nurǵalıev.
Tobyl-Torǵaı aımaǵyndaǵy avtokólik joldarynyń jalpy uzyndyǵy 7 750 shaqyrym, bul jóninde óńir respýblıkada ekinshi orynda tur.
Oljas Nurǵalıevtiń aıtýynsha, qazir oblysta «Nurly jol» baǵdarlamasy qarqyndy júzege asyrylýda. Josparlanǵan 17 jobanyń 15-i bastalyp, ekeýine memlekettik satyp alý portalynda konkýrs jarııalanǵan. Al «Aýyl – El besigi» baǵdarlamasy boıynsha bıyl 50 joba qolǵa alynǵan. Qazir 18 ýchaskede jóndeý jumystary bastalyp ketken, al qalǵan 32 jobaǵa merdigerler tańdalyp jatyr.
Sonymen qatar, jergilikti bıýdjetten bólingen qarajat esebinen 211 ýchaskede jóndeý jumystary bastalynyp, taǵy jeti nysanǵa konkýrs jarııalanǵan.
