Bolat aǵa Jaısańbaevty kórgen saıyn osy qarttyqtyń ózi salystyrmaly uǵymdaı kórinedi. Onyń qurdastaryna qaraısyń da, bular onymen jasty deýge kóńil qımaıdy. Tipti, olar bir-birine qaljyń aıtyp jatqanda basqalardyń Bókeńe qaraı aıtqandary artyqtaý kórinetini de bar. Biraq shyndyqty moıyndamasqa lajyń joq. Bókeń de 80 deıtin jasqa kelip qaldy. Keıbir qurdastaryndaı mújilmeı, sergek kóńilmen, jaıdary júzimen keldi.
Bolat aǵa Jaısańbaevty kórgen saıyn osy qarttyqtyń ózi salystyrmaly uǵymdaı kórinedi. Onyń qurdastaryna qaraısyń da, bular onymen jasty deýge kóńil qımaıdy. Tipti, olar bir-birine qaljyń aıtyp jatqanda basqalardyń Bókeńe qaraı aıtqandary artyqtaý kórinetini de bar. Biraq shyndyqty moıyndamasqa lajyń joq. Bókeń de 80 deıtin jasqa kelip qaldy. Keıbir qurdastaryndaı mújilmeı, sergek kóńilmen, jaıdary júzimen keldi.
Bul kisini osylaı kórsetetini, sirá, onyń boıyna bitken eńbekqorlyǵy, qarapaıymdylyǵy, adaldyǵy, tazalyǵy ma dersiń. Osydan qyryq jyldaı buryn ony alǵash kórgenimizde Bókeń osyndaı sııaqty edi. Sonda da ózinen kóp kishi eńbektes áriptesterine óziniń úlkendigin buldamaıtyn. Basqaǵa ıtere salý joq, jumysty jastarmen jarysyp tyndyryp jatar edi. Sonysy úshin keıingi býyn Bolat aǵasyn jaqsy kóretin.
Al Bókeńderdiń jumysy, qazirgideı emes, sonda qıyn edi. Gazetti basyp shyǵarý tańǵa deıin sozylatyn. Eń sońǵy núkteni qoıatyn sol gazet shyǵarýshy, Bókeńder. «Sosıalıstik Qazaqstan» deıtin eldiń bas gazeti kún saıyn shyǵady. Kezegiń kúnara bolǵanmen, árkez tańǵa deıin júrý jaı qaljyratyp qana qoımaı, júıkege aýyr tıedi. Kóp adam sony kótere almaıdy. Tili shyǵady, sol til basqaǵa tıedi. Mine, sol júıkeniń juqarýy Bókeńde bola qoımaıtyn. Ony ózgelerden ereksheleıtin de sol.
Kóbine biz basshyǵa, ataǵy bar tulǵalarǵa kóbirek qurmet kórsetip jatamyz. Ony da jón delik. Basshy laýazymǵa, ataqqa jetý de jaıdan-jaı kelmeıdi, onyń jolynda talaı tógilgen ter, qajyrly eńbek jatyr. Biraq keıbir adamdardan sol laýazymdy, ataqty alyp tastasań, ar jaǵynda túk te qalmaıdy. Al Bolat aǵamyzda laýazym da joq, ataq ta joq, biraq oǵan degen jurttyń qurmeti bir pendeniń basyna jeterlik. Qashanda bolsyn birsydyrǵy azamattyq qalpy. Bireýden qurmet te suramaıdy, jasym úlken dep tórge de umtylmaıdy. Al úlkennen de, kishiden de oǵan degen qurmet árqashan daıyn.
Ár adamnyń qadiri aldymen óz ujymynda ańǵarylady ǵoı. Uzaq jyl «Egemen Qazaqstanda» gazet shyǵarýshy bolyp qyzmet atqarǵanda Bolat Jaısańbaev redaksııa ujymynyń eń syıly adamynyń biri boldy. Oǵan tııanaqty da tyndyrymdy eńbegimen qatar, bireýge qalaıda jaqsylyq jasasam degen peıilde júretin jaǵymdy minezi sebepshi. Jurttyń bárine jaǵý qıyn deımiz ǵoı, al Bókeń jaǵatyn. Tipti, jumys jaıyna oraı bireýge daýys kóterse de sol adamnyń ózi ony syılaýdan shektelmes edi. Jumys baby deıtinimiz bar, soǵan oraı Bolat aǵamyz redaksııanyń barlyq qyzmetkerimen baılanysta júrdi. Tús shaıysqan eshqaısysy joq. Tipti, redaksııa basshylarynyń ishindegi jumysqa degen talapshylyqtary qatqyldaý Balǵabek Qydyrbekuly, Erjuman Smaıyl da Bókeńe kelgende jumsaqtaý edi. Al qasynda kóbirek bolatyn korrektorlar qaýymy, jalpy redaksııanyń kishi býyn qyzmetkerleri ony ákesindeı, aqylshy aǵasyndaı kórer edi. Keıbir qyzmeti basqa jaqqa aýysqan Ábdimútál Álibekov, Tilekqabyl Boranǵalıev, Baqtııar Erimbetov sııaqty inileriniń árkez ony izdep, surastyryp júretini de bar.
Bókeń eńbek demalysyna shyqqannan keıin de óz ujymynan qol úzgen emes. Eńbek demalysy degende, Bolat aǵamyz oǵan eki ret shyqqandaı bolǵan. Sol kezdegi tártip boıynsha zeınetke shyqqan adam jumys istese, zeınetaqy tólenbeıtin bolǵan soń, amalsyz ketken edi. Asa bilgir qyzmetkerinen redaksııa da qımaı qoshtasqan. Keıinirek tártip ózgergen soń, ol óziniń kóp jyl jumys istegen ujymyna qaıta oralyp, qaıta bir jasaǵandaı bolǵan. Sodan keıin redaksııa Astanaǵa kóshkenshe jastarǵa aǵa, aqylshy bolyp júrdi.
– 80 degen de az jas emes-aý, bizdi eńbek shyńdady ǵoı, – deıdi Bolat aqsaqal. – Men óz ujymymnan eshqashan da qol úzgenim joq, «Egemen Qazaqstan» gazeti kún saıyn úıime kelgende ujymymmen ushyrasqandaı bolam. Keshegi kúnder eske túsedi. Kóńil jasaryp qalady.
Kóńilińiz qartaımasyn, Bóke!
Mamadııar JAQYP,
«Egemen Qazaqstan».
