Atyraý oblysynyń ekologtary qorshaǵan ortany lastaǵan óndiris oshaqtaryn anyqtap, olardyń jumysyn toqtatý jóninde usynys jasady. Bul týraly «Astana» telearnasy habarlady.
Arnaıy júrgizilgen tekserý barysynda Atyraý munaı óndeý zaýytynyń jáne «Aqjaıyq-7» jaýapkershiligi shekteýli seriktestiginiń aýaǵa zııandy zattardy belgilengen mólsherden tys shyǵarǵany dáleldendi.
Buǵan deıin ǵalamtorda jergilikti halyqtyń jaǵymsyz ıisten basy aınalatyny týraly jazylǵan bolatyn. Ile Atyraý oblystyq ekologııa departamenti tarapynan tekserý júrgizilip, birqatar kemshilikter anyqtaldy. Osy mekemeniń shyǵarǵan qorytyndysyna júginsek, túngi mezgilde kúkirt sýteginiń konsentrasııasy mólsheri 140 eseden asyp ketedi eken. «Bir ǵana «Aqjaıyq-7» jaýapkershiligi shekteýli seriktestiginiń óndirisi qorshaǵan ortaǵa orasan zalal tıgizýde. О́ıtkeni, bul jerde munaı óniminen bosaǵan sısternalardy jýatyn stansanyń qyzmeti talapqa saı emes. Sondyqtan bul seriktestik jumysyn toqtatý týraly sotqa talap-aryz joldaımyz», deıdi oblystyq ekologııa departamentiniń basshysy Erbol Qýanov.
Joǵaryda atalǵan óndiris oshaqtarynyń birde-bireýinde aýaǵa shyǵatyn zııandy qaldyqtardy ustap qalatyn qondyrǵylar ornatylmaǵan. Mundaı derek jergilikti óńirde buǵan deıin de tirkelgen kórinedi. Osyǵan baılanysty turǵyndar munaı ónimimen aınalysatyn óndiris oshaqtaryna túpkilikti tekserý júrgizý qajettigin alǵa tartyp otyr.
Danııar Túımebaı.
Derekkóz: «Astana» telearnasy
Foto: Azh.kz.
