Osy bir eki jastyń toıy ótkenine biraz bolyp qaldy. Juptary jarasqan Meıirjan Qýanyshev pen Sáýle Slambekqyzynyń tatý-tátti tirshiligi ekiniń birin tánti etkendeı. Meıirjannyń qos janary semip qalǵan ǵashyq jary Sáýlege iltıpaty múldem bólek. Ol qaladaǵy bir kúzet bóliminde eńbek etedi. Jalaqysy da máz emes. Jumystan oralǵan boıda Sáýleniń qas-qabaǵyna qarap, úı tirshiligine belsene aralasyp ketedi. Qoldary bosasa birge serýendeıdi, toı-dýmandarǵa barady, syr aǵytyp qaıtady. Iá, mundaı qos júrekteri uǵysqan ǵajap jandar ómiri ekiniń birine ónege desek, artyq bolmas.
Osy bir eki jastyń toıy ótkenine biraz bolyp qaldy. Juptary jarasqan Meıirjan Qýanyshev pen Sáýle Slambekqyzynyń tatý-tátti tirshiligi ekiniń birin tánti etkendeı. Meıirjannyń qos janary semip qalǵan ǵashyq jary Sáýlege iltıpaty múldem bólek. Ol qaladaǵy bir kúzet bóliminde eńbek etedi. Jalaqysy da máz emes. Jumystan oralǵan boıda Sáýleniń qas-qabaǵyna qarap, úı tirshiligine belsene aralasyp ketedi. Qoldary bosasa birge serýendeıdi, toı-dýmandarǵa barady, syr aǵytyp qaıtady. Iá, mundaı qos júrekteri uǵysqan ǵajap jandar ómiri ekiniń birine ónege desek, artyq bolmas.
Aıaldamada avtobýs kútip otyrǵandar áńgimeni odan-budan qozǵap otyr. Qasyma beıtanys bir kisi kelip otyra ketti.
– Qaı jerdiń jigiti bolasyń?
– Araldyń Aqshataýynanmyn. Tasbógettegi Muratbaev kóshesinde turamyn.
– Zeınetkersiń be?
– Áli úsh jyl bar. Qalada bir mekemede aǵash jonýshymyn. Esik, tereze isteımin. Jalaqym 45 myń teńgedeı, eki ul, eki qyzym bar. Ekeýi stýdent, aqyly oqýda. Zaıybym úı sharýasynda. Jumystan álgi ázirde shyqtym.
– Jaqsy eken, úrim-butaǵyń ósip keledi eken, azamatym!
– Shúkir, shúkir aǵa! Al, ózińiz qandaı qyzmet isteısiz? – dep beıtanys kisi qarsy suraq qoıdy. Sheshilip sóıleýge shyqty.
– Zeınetkermin. Birer jylda seksenniń tóbesin kóreıin dep turmyn.
– Aǵasy, áli qýatty kórinesiz. Biz alpysqa jetpeı dińkelep qaldyq, – dep ázil qaǵystyrdy.
Áńgimemiz jalǵasa berdi. Avtobýstan áli habar joq. Ekeýara biraz áńgimeniń basyn shaldyq.
– Otbasyn qurǵan ul-qyzdaryń bar bolar, inim deı bergenimde: – Á, bul suraq sál aýyrlaý tıip tur. Bir ulym jaqynda úılendi. Kelinimniń eki kózi kórmeıdi. Balam osy qyzǵa úılenem dep otyryp aldy. Qazir birge turamyz. Sonaý 1972 jyly salyp alǵan tórt bólmeli úı sál-pál tarlyq qylǵandaı. Kóńil jarassa bári keń ǵoı. Soǵys jyldarynda koreı, cheshen aǵaıyndarǵa bir bólmemizdi bosatyp bergen babalarymyz, – deı bergende avtobýs keldi. – Saý bolyńyz aǵa! – dep beıtanys jigit Tasbóget qonysyna qaraı attanyp ketti.
Men keler avtobýsqa otyrdym. Uzaq oı ústinde kelemin. Uly jaqynda úılengen, kelininiń eki kózi kórmeıdi. Munda qandaı syr bar? Eki jastyń qosylýy meni tańyrqatýmen boldy. Birer kúnnen soń qala irgesindegi Tasbóget qonysynan Qýanysh Qypshaqov atty jigittiń otbasyn izdeýge shyqtym. Muratbaev kóshesindegi №71-shi úı eken. Aýla ishindegi bir bólmeden stanok daýysy estildi. Aldymnan budan birer kún burynǵy kezdesken jigit aǵasy ushyrasty. Shaǵyn bólmede aǵash jonyp jatyr. Dereý jumysyn tastaı salyp, úıge qaraı bettedik.
Aldymyzdan enesi Jańagúl, bularǵa ilese uly Meıirjan, kelini Sáýle shyqty.
– Otaý qurǵandaryń qutty bolsyn!
– Rahmet aǵa, – dep Meıirjan, Sáýle ekeýi ile dastarqan jaıdy.
– Al, áńgimeni aıta otyr, jas otaý ıesi Meıirjan?
– Aǵa, men bıyl jıyrma altydamyn. Ata-anam qartaıyp keledi. Nesin jasyraıyn, naǵyz kelin jumsaıtyn kezi. Qyzdarǵa kóz salyp júrgenmin. Birde dosym Nurlybektiń úıine bardym. Áıeli Elvıranyń qasynda bir qyz shaı iship otyrdy. Symbaty kelisken. Biraz syr aǵyttyq. О́zin Sáýle dep tanystyrdy, telefonynyń nómirin suradym. Arada birer aı ótti.
– Sáýle, ózińmen qosylý oıymda bar, qalaı qaraısyń? – dedim.
– Oı, Meıirjan-aı, meniń eki kózim kórmeıdi ǵoı. Seniń otbasyńa salmaq túsiremin, saǵan da ońaı tımeıdi.
– Joq, saǵan qosylamyn. Otbasymmen aqyldastym, Sáýle! Men seni súıemin...
– Qınamashy, Meıirjan! Mendeı múgedek jandy qaıtesiń?
Osy sátte Meıirjan kózinen jasty irkip aldy. Qarsy aldynda turǵan Sáýleniń qos janarynan tamshylaǵan jas jigit kókiregin jýyp ketti. Qos ystyq qushaq ot bolyp sharpyldy. Jigit tós qaltasyndaǵy oramalymen kóz jasyn tııa almaı uzaq turdy.
– Ata-anamnyń aldynan ótip, batasyn alaıyq, – degen Sáýleniń ótinishin qup aldy Meıirjan.
Kúzdiń shýaqty kúnderiniń biri edi.
Sáýleniń otbasyna kúıeý jigit Meıirjan Qýanyshevtiń aǵaıyn-týystary keldi. Eki jasqa aq bata jaýdy. Uzatý toıynyń bolar kúni belgilendi. Sáýleniń ákesi Slambek pedıatr-dáriger, anasy Anna terapevt-dáriger edi. Toıdy qalanyń Gagarın shaǵyn aýdanyndaǵy «Túımekent» dámhanasynda ótkizýdi uıǵardy. Sonymen toı-dýman jaqsy ótti. Keler toı Meıirjan Qýanyshevtiń otbasynda jalǵasty.
Álgi ázirde Meıirjan telefon shaldy. Búgin aǵaıyn-týǵandardyń basyn qosyp, atasy Slambek pen zaıyby Annany qonaqqa shaqyrypty. Solarmen dastarqandas bolýdyń maǵan da sáti tústi. Quraqtaı ushyp, qonaqtardy kútip júrgen Meıirjan-Sáýleler taǵy da qarsha jaýǵan kóptiń batasyn alyp, qol jaıyp turdy.
Bul kúnderi jas otbasylar tatý-tátti ómir súrýde. Aldaǵy armandary ushan-teńiz. Jańa páterden eki bólmeli úı tıse, bir shańyraq bolyp otyrsaq deıdi. Qaısykúni ýchaskelik dáriger úıge kelip, Sáýleniń perzenthanaǵa emdelý qajettigine nusqaý berip ketipti. Qýanyshevtar áýletinde taǵy bir toı-dýman kezek kútip turǵan syńaıly. Dúnıege jas sábı keler kún jaqyndaı túsken tárizdi. Al, buǵan qýanbaı kór. Qos júrek – qos ǵashyq osy bir sátti taǵy da asyǵa kútip otyr.
Qaıyrbek MYRZAHMETULY.
Qyzylorda oblysy,
Tasbóget aýyly.
