Basqosý barysynda «Teriskeı tolǵaýlary» kitabynyń tanystyrylymy men tusaýkeseri ótti.
«Áziret Sultan» memlekettik tarıhı-mádenı qoryq-mýzeıiniń qoldaýymen jaryq kórgen kitaptyń avtory - Qazaq Ulttyq óner ýnıversıteti «Dombyra» kafedrasynyń professory, kúıshi, Qazaqstannyń eńbek sińirgen qaıratkeri Janǵalı Júzbaı.
Kitap Qorqyt baba murasynyń jalǵasy Yqylastyń shákirti, Qarataý kúıshilik mektebiniń negizin qalaýshy, kúıshi-kompozıtor Súgir Áliulynyń muralaryna arnalǵan. Onda Súgirdiń 60 kúıi jáne onyń ustazdary men ónegesin kórgen shákirtteriniń sırek oryndalatyn týyndylary jınaqtalǵan.
«Kitaptyń ishinde jańalyq óte kóp. Basym bóligi - buryn jarııalanbaǵan kúıler. Kitapqa zamanynda ózi ónege kórgen jáne batasyn alǵan ustazdary – Táttimbet Qazanǵapuly, Yqylas Dúkenuly, Saıdaly sary Toqa, Bapysh Qojamjaruly, Satybaldy Begaıdaruly syndy halyq kúıshileriniń týyndylary men Súgir mektebiniń ókilderi, onyń ishinde Asqar Súleımenov, Myrzataı Joldasbekov, Kóbdik Kárbozov, Jappas Qalambaev, Tólegen Mombekov, General Asqarov syndy kóptegen kompozıtorlardyń kúıleri kirdi. Súgir Áliulynyń oryndalmaǵan kúıleri óte kóp.
Revolıýsııaǵa deıingi, sovet kezeńindegi, «Sozaq kóterilisi», «Dala ańyzy» sııaqty kúıleri birneshe taraýǵa bólinedi», dedi avtor.
Avtor kitapqa engen kúılerdi zerttep, notaǵa túsirý, olarǵa mýzykalyq analız jasaý sııaqty máselelerge 15 jyldaı ýaqytyn arnaǵan.
Onlaın formatta ótken jıynǵa «Áziret Sultan» memlekettik tarıhı-mádenı qoryq-mýzeıi dırektorynyń mindetin atqarýshy Ersin Tájibaev, memleket jáne qoǵam qaıratkeri, fılologııa ǵylymdarynyń doktory, professor Myrzataı Joldasbekov, fılologııa ǵylymdarynyń doktory, professor, jazýshy Qulbek Ergóbek, Qazaq Ulttyq óner ýnıversıteti «Dombyra» kafedrasynyń professory, kúıshi, Qazaqstannyń eńbek sińirgen qaıratkeri Janǵalı Júzbaı, ál-Farabı atyndaǵy Qazaq Ulttyq ýnıversıtetiniń professory, súgirtanýshy Mádı Baıdáýletov, Súgir Áliulynyń urpaǵy, nemeresi Qaldan Tursynbaev, Qurmanǵazy atyndaǵy ulttyq konservatorııasynyń professory, «Halyq aspaptary» fakýltetiniń dekany Erjan Jámeńkeev, Shymkent mýzyka kolledjiniń aǵa oqytýshysy Marat Anashev jáne tarıhshylar men ǵalymdar, jas kúıshiler, ulttyq aspapta oınaýshylar qatysyp, oı-pikirlerimen bólisti.
