Jalpy, medısınalyq ońaltý úsh kezeńnen turady:
Birinshisi aýrýy asqynyp turǵan naýqastarǵa, hırýrgııalyq operasııa jasatqan, jaraqat alǵan adamdarǵa arnalǵan. Ol stasıonarlardyń qurylymdyq bólimshelerinde júrgiziledi.
Eger pasıentti aýrýhanaǵa jatqyzý qajet bolmasa, medısınalyq kómek kórsetilgennen keıin jáne negizgi aýrý emdelip bolǵannan keıin pasıent ońaltýdyń ekinshi nemese úshinshi kezeńine jiberiledi.
Ońaltýdyń ekinshi kezeńi mamandandyrylǵan bólimshelerde nemese respýblıkalyq densaýlyq saqtaý uıymdary, mamandandyrylǵan ońaltý ortalyqtary men kópbeıindi stasıonarlar bazasynda ótedi. Bul kezeń aýrý bastalǵan sátten bastap toǵyz aı ishinde júrgizilýi qajet. Kýrstyń uzaqtyǵy men jıiligi nozologııaǵa, naýqasty densaýlyq jaǵdaıyna, taǵy da basqa faktorlarǵa baılanysty.
Úshinshi kezeńde medısınalyq ońaltý emhana-ambýlatorııa deńgeıinde, kúndizgi jáne táýlik boıǵy stasıonarlarda, ońaltý ortalyqtarynda, shıpajaılar men kýrorttarda, úıdegi stasıonar jaǵdaıynda, sondaı-aq qashyqtyqtan júrgiziledi. Kýrstyń jıiligi men uzaqtyǵy pasıenttiń densaýlyǵyna qaraı belgilenedi.
«Áleýmettik medısınalyq saqtandyrý qorynyń Nur-Sultan qalasy boıynsha fılıaly 2021 jyly ońaltý qyzmetterin kórsetetin 45 medısına uıymymen kelisimshart jasaǵan. Olardyń ishinde: 20 jekemenshik, 22 memlekettik, 3 respýblıkalyq medısına uıymy bar.
Jyl basynan beri elordada 3,23 mlrd teńgeden asa somaǵa ońaltý qyzmeti kórsetildi. Ambýlatorııalyq-emhanalyq deńgeıde 204 mln teńge somasyna 252 001 qyzmet kórsetildi», dep atap ótti Áleýmettik medısınalyq saqtandyrý qorynyń Nur-Sultan qalasy boıynsha fılıalynyń dırektory Nurlybek Qabdyqaparov.
Koronavırýstyq pandemııa ońaltýdyń qanshalyqty mańyzdy ekenin jáne bul bastama qanshalyqty ýaqytyly júzege asyrylǵanyn kórsetti. Áleýmettik medısınalyq saqtandyrý qory halyq úshin ońaltýdyń qoljetimdiligin arttyrý boıynsha belsendi jumystardy jalǵastyrýda.
Koronavırýs ınfeksııasy kovıdten keıingi túrli asqynýlarmen aýyrǵandar úshin qaýipti. Kovıdten aıyǵyp shyqqan naýqastardyń basym kópshiligi, demikpemen qosa, júrek, býyn aýrýlarynyń belgisi mazalaıdy. Sondyqtan naýqas koronovırýspen aýrýhanaǵa túsken kezde em-sharamen birge dáriger reabılıtologtyń da keńesin alady. Maman óziniń qosymsha emdeýin taǵaıyndaıdy. Ol tegin medısınalyq kómektiń kepilendirilgen kólemi aıasynda kórsetiledi. Al ekinshi jáne úshinshi ońaltý kezeńin pasıent Mindetti áleýmettik medısınalyq saqtandyrý aıasynda alady.
N.Qabdyqaparovtyń aıtýynsha, Medısınalyq saqtandyrý qorynyń negizgi basymdyqtarynyń biri – pasıent quqyǵyn qorǵaý. Osyǵan oraı keri baılanys quraldary arqyly túsetin shaǵym-ótinishter erekshe baqylaýda bolady.
«Medısınalyq uıymdar Pasıentterdi qoldaý qyzmetiniń jumysyn jolǵa qoıyp, tirkelgen turǵyndardyń muqtajdyqtaryna-suranystaryna jaýapkershilikpen qaraýy qajet», dedi ol.
Aıta keteıik, qandaı da bir mekeme emdelýshige medısınalyq kómek berýden bas tartsa nemese ońaltý erejelerine qatysty suraqtar týyndasa, 1406 baılanys ortalyǵyna habarlasýǵa nemese «Qoldau - 24/7» mobıldik qosymshasy arqyly ótinish qaldyrýǵa bolady.
