Sport • 11 Shilde, 2021

Almatyda kásipqoı boks keshi ótti

93 ret kórsetildi

Almatydaǵy Balýan Sholaq atyndaǵy sport saraıynda kásipqoı boks keshi ótti. Asqar Salyqbaev jetekshilik etetin MTK Kazakhstan menedjerlik kompanııasynyń uıymdastryýymen ótken aıtýly jarystyń basty jekpe-jeginde qazaqstandyq Sultan Záýirbek pen shotlandııalyq Ronnı Klark judyryqtasty, dep habarlaıdy Egemen.kz.

Ekinshi jartylaı jeńil salmaqta óner kórsetip júrgen aıtýly boksshylar Alataý bókterinde WBO European nusqasynyń chempıondyq beldeýin sarapqa saldy. Sultannyń esimi jergilikti jankúıerlerge jaqsy tanys. Kezinde áýesqoılar rınginde biraz belesterdi baǵyndyrǵan 25 jastaǵy qandasymyz qazirgi kezde kásipqoılar arasynda táýir nátıje kórsetýde. Anyqtap aıtsaq, ol osyǵan deıingi 10 kezdesýiniń barlyǵyn jeńispen aıaqtap, jeti qarsylasyn esinen tandyrdy. Qarsylasy – Ronnı Klark. Kezinde Eýropa chempıony atanǵan 36 jastaǵy Shotlandııanyń ókili 25 ret sharshy alańǵa kóterilip, 21 ret basymdyq tanytty. Qos sańlaq arasyndaǵy 10 raýndqa sozylǵan jekpe-jekte Sultan Záýirbektiń ústemdigi esh kúmán týǵyzǵan joq. Bizdiń jigittiń myqtylyǵyn barlyq tóreshiler biraýyzdan moıyndady. Osylaısha, Sultan Almatyda altyn belbeýdi ıelendi.

Kópshilik asa aýyr salmaqtaǵy Ivan Dychko men Denıs Bahtov arasyndaǵy básekeni taǵatsyzdana kútti. Olımpııa oıyndary men álem chempıonattarynda san márte jeńis tuǵyryna kóterilgen 30 jastaǵy jerlesimiz kásipqoı rıngtegi óziniń toǵyz kezdesýin AQSh-ta ótkizip, barlyǵynda jeńis toıyn toılady. Bul – Dychkonyń Qazaqstandaǵy alǵashqy jarysy. 41 jastaǵy Denıs Bahtovty da jankúıerler jaqsy biledi. Qaraǵandyda týyp-ósken ol keıinnen Reseıge qonys aýdardy. Denıstiń kásipqoılar arasynda judyryqtasyp júrgenine tabany kúrekteı 22 jylǵa jýyqtady. Sol aralyqta ol 58 márte rıngke kóterilip, 39 ret basymdyq tanytty. Kezinde dańqy dúrkirep turǵan Bahtovtyń «boldyryp qalǵanyn» bul joly anyq baıqadyq. Ivan ony birinshi raýndta uryp jyǵyp, aýyr nokaýtqa jiberdi. 

Qazaqtyń myqty boksshylary – Dáýren Eleýsinov pen Arman Rysbek arasyndaǵy ózara kezdesý de kórermenderdiń erekshe qyzyǵýshylyǵyn týdyrdy. Áýesqoılar arasynda eleýli tabystarǵa qol jetkizgen qos qandasymyz kásipqoılar retinde de «qara jaıaý emes» ekenderin baıqatty. Bul báseke barysynda olar baryn saldy. Desek te Daýren qarsylasyna qaraǵanda áldeqaıda alymdy kórindi. Besinshi raýndtan soń Arman jekpe-jekti jalǵastyrýdan bas tartty.

Kásipqoılar arasynda judyryqtasyp júrgenine asa kóp ýaqyt bolmasa da, mıllıondaǵan jankúıerdiń nazaryn ózine aýdaryp úlgergen Tursynbaı Qulahmettiń de qarqyny qýantarlyq. Bul joly ol 35-ten asa kezdesý ótkizgen Reseıdiń saqa sportshysy Alekseı Evchenkony 10-raýndta nokaýtqa jiberip, birinshi orta salmaqtaǵy WBC International nusqasynyń altyn belbeýin ıelendi.

Sondaı-aq, Almatydaǵy boks keshinde Saǵadat Rahmanqulov, Nurbol Sultanbaı, Talǵat Sháıken, Aıdos Medet, Rahat Seıitjan, Erjan Zalılov, Raı Seıitjanov, Qanaǵat Manaulty syndy qazaqtyń bylǵary qolǵap sheberleri ózderiniń kezekti jeńisterine qol jetkizdi. 

Sońǵy jańalyqtar

Elordada Ulttyq Onim kórmesi ashyldy

Elorda • Búgin, 16:52

Dollar 425 teńgeni qurady

Qarjy • Búgin, 16:33

Aqtóbede jol apatynan eki adam qaza tapty

Aımaqtar • Búgin, 13:35

Uqsas jańalyqtar